Komisioni Evropian do të prezantojë së shpejti propozimin e tij për të ndaluar produktet që vijnë nga puna e detyruar.

Drafti është përgatitur që prej një viti dhe të dhënat e fundit provojnë se puna e detyruar është një problem alarmant.

Sipas një raporti të publikuar këtë javë nga 2 agjenci të OKB-së dhe një OJQ, puna e detyruar prek: 27.6 milionë njerëz; 3.3 milionë prej të cilëve fëmijë dhe 86 për qind që punojnë në sektorin privat.

Sa i takon rasteve kur 14 për qind e punës imponohet nga shteti, minoriteti mysliman në provincën kineze të Xinjiangut përmendet shpesh herë.

Në kuadër të sesionit plenar në Strasburg, Partia e Gjelbër e diskutoi çështjen me përfaqësues të shtypit dhe një aktiviste.

“Prej 5 vitesh, ne e dimë që Kina po e përdor popullsinë ujgure për punë të detyruar. Ata po shfrytëzohen në industrinë e tekstileve, teknologjisë dhe telekomunikacionit”, tha Dilnur Reyhan, presidente e Institutit Evropian të Ujgurëve.

Parlamenti Evropian po kërkon një instrument të ngjashëm me ata të përdorur në Kanada dhe Shtetet e Bashkuara.

Kur ka dyshime të mjaftueshme për punë të detyruar në një vend të caktuar, kompanitë duhet të provojnë se nuk i përdorin prodhimet e tyre. Partia e Gjelbër nuk e pëlqen qasjen e moderuar.

“Propozimi i Komisionit Evropian është që autoritetet lokale të hetojnë pas sinjalizimeve të shoqatave, ekspertëve, apo organizatave. Në të tilla raste ekziston rreziku që hetimi të mos jetë efikas”, u shpreh Yannick Jadot, euro-deputet francez, të Gjelbrit.

Legjislacioni do të duhet të aprovohet nga Parlamenti Evropian dhe shtetet anëtare. Dy vjet nga publikimi i tij, ai do të imponohet në nivel kombëtar.