Presidentja e Kosovës Vjosa Osmani i ka bërë sot nderimet mbretëreshës së ndjerë britanike Elizabeth II në Westminster Hall në Londër.

“Ne bashkohemi me kolegët e tjerë dhe popullin e Mbretërisë së Bashkuar për të nderuar trashëgiminë e saj të një jete të përkushtuar ndaj shërbimit”, ka shkruar Osmani në Twitter.

Funerali i mbretëreshës britanike Elizabeth II mbahet nesër, me pjesëmarrjen e 500 personaliteteve nga e gjithë bota.

Më shumë se 10.000 policë do të jenë në detyrë të dielën dhe do të përforcohen nga oficerët e rrugës së Londrës, si dhe oficerë nga të gjitha 43 forcat policore në Britani. Do të ketë gjithashtu qindra vullnetarë dhe anëtarë të forcave të armatosura për të garantuar sigurinë.

Përdorimi i dronëve mbi qendrën e Londrës është ndaluar përkohësisht dhe aeroporti Heathrow do të ndalojë dhjetëra fluturime për të parandaluar zhurmën që të prishë një shërbim funerali.

Policia ka ngritur më shumë se 36 km gardh në qendër të Londrës për të kontrolluar turmat dhe shërbimet e metrosë dhe trenit do të rriten. Rreth një milion njerëz pritet të dynden në qendër të Londrës.