Anëtarja suedeze e Parlamentit Evropian, Abir Al-Sahlani, preu flokët gjatë një fjalimi në Strasburg për të treguar solidaritet me protestuesit në Iran. Ajo u shpreh si më poshtë.

Ne popujt dhe qytetarët e BE-së kërkojmë ndalimin e menjëhershëm të dhunës ndaj grave dhe burrave në Iran. Derisa Irani të jetë i lirë, zemërimi ynë do të jetë më i madh se shtypësit. Derisa gratë e Iranit të lirohen, ne do të qëndrojmë me ju. Jin, Jiyan, Azadî. Gratë, jetë, liri!

Ajo kritikoi deputetët e tjerë në fjalimin e saj, teksa tha se ata kanë bërë shumë pak përkundër guximit që kanë treguar gratë e Iranit gjatë protestave të përhapura të javëve të fundit.

Kujtojmë se protestat kanë tronditur Iranin që kur e reja 22-vjeçare Mahsa Amini vdiq më 16 shtator pas arrestimit të saj nga policia e moralit në Teheran, me arsyetimin se nuk respektoi kodin e rreptë të veshjes së Republikës Islamike për gratë.

Së fundmi, protestave antiqeveritare u janë bashkuar edhe vajzat e shkollave të mesme. Mbi 50 persona besohet se janë vrarë deri më tani në këto protesta dhe duke arrestuar mbi 1500 të tjerë. Por iranianët kanë vazhduar të dalin në rrugë masivisht.