I dërguari i Bashkimit Europian për dialogun Kosovë-Serbi, Mirosllav Lajçak, e përshkruan si “të gjatë e të vështirë, por të drejtë”, takimin e mbrëmshëm me presidentin serb, Aleksander Vuçiç në Beograd. Sipas zyrtarit europian, palët ranë dakord që të gjitha marrëveshjet e arritura në Bruksel, të zbatohen. Në një postim në Twitter, Lajçak shkruan:

Mbështetem në sjelljen e përgjegjshme të të gjithëve, për të treguar përmbajtje për siguri e stabilitet. Dhuna duhet të shmanget!

Long and difficult, but fair discussion with @predsednikrs @avucic last night.

I count on the responsible behavior of all to show restraint for security and stability. Violence must to be avoided.

Agreed that all Dialogue agreements have to be upheld and fully implemented. pic.twitter.com/8wUnW7nR0t

— Miroslav Lajčák (@MiroslavLajcak) November 5, 2022

Deklaratat i bëri pak orë para se pjesëtarët e Listës Serbe, partisë më të madhe të serbëve në Kosovë të vendosin sot nëse do të largohen apo jo nga institucionet e Kosovës, në shenjë proteste për pezullimin e kreut të policisë në Mitrovicën e Veriut, Nenad Gjuriç. Ky i fundit refuzoi të zbatojë vendimin e qeverisë së Albin Kurtit për riregjistrimin e makinave me targa RKS-Republika e Kosovës.

Lista Serbe ka një post ministror në kabinetin e Kurtit, ndërsa në Kuvendin e Kosovës, kjo parti e cila gëzon mbështetje të madhe nga presidenti serb Vuçiç, përfaqësohet me dhjetë deputetë. Po sot, një takim lidhur me situatën në Kosovë do të zhvillojë edhe qeveria e Serbisë, madje me pjesëmarrjen e Vuçiçit.

Në fillim të muajit, Prishtina zyrtare nisi zbatimin e planit me tri faza për riregjistrimin e makinave, që targat e lëshuara nga Serbia të zëvendësohen me të Republikës së Kosovës, në veriun me shumicë serbe. Faza e parë përfshin këshillimin e shoferëve, e dyta shoqërohet me gjobë deri në 150 euro për drejtuesit e këshilluar më parë dhe e treta, targa provuese.

Lista Serbe pati paralajmëruar rezistencë të ashpër që në momentin kur të vendoset gjoba e parë lidhur me targat. Zbatimi i këtij plani pritet të përfundojë më 21 prill të vitit të ardhshëm e nga ajo datë, në qarkullim do të lejohen vetëm makina me targa RKS në Kosovë.