Ajo që Katari priste prej 12 vitesh kur mori lajmin se do të jetë vendi organizator i Botërorit të Futbollit 2022, tashmë është realitet. Mes shkëlqimit të dritave e spektaklit të fishekzjarreve, sot ngre siparin edicioni i 22-të i kompeticionit më të rëndësishëm futbollistik, me pjesëmarrjen e 32 skuadrave të ndara në 8 grupe. Ndërkohë, ka edhe një “skuadër” tjetër që nuk luan futboll, por u kthye në “mollë sherri” mes FIFA-s e grupeve që mbrojnë të drejtat e njeriut, për të cilët kjo është “skuadër e abuzuar”.

Në përbërje ka rreth 30 mijë punëtorë të huaj (referuar shifrave të qeverisë së Katarit), të punësuar vetëm për ndërtimin e stadiumeve. Shumica janë nga Bangladeshi, India, Nepali e Filipinet, ndërsa grupet për të drejtat e njeriut thonë se “në dukje, investimet janë marramendëse, por të paguara me mijëra jetë punëtorësh”.

Të ardhur nga vende të ndryshme, punëtorët u përballën me kushte të rënda pune, si edhe banimi në Katar.

Në një raport të publikuar rreth dy vjet më parë, gazeta britanike “Guardian” vlerësonte se mbi “6 mijë e 500 punëtorë emigrantë nga India, Pakistani, Nepali, Bangladeshi e Sri Lanka gjetën vdekjen në Katar, që nga koha kur vendi i Gjirit Persik fitoi të drejtën e organizimit të Kupës së Botës, në vitin 2010”. Numri i dhënë bazohet në të dhënat e ambasadave të vendeve të huaja në Katar.

Qeveria e Katarit mohon akuzat e flet për “mashtrim” me shifrat, duke vënë në dukje se “jo të gjitha vdekjet e regjistruara janë të njerëzve që kanë punuar në projekte të lidhura me Kupën e Botës”.

Në vitet 2014-2020, 37 punëtorë humbën jetën në kantieret e ndërtimit të stadiumeve të Kupës së Botës. Vetëm tre prej tyre ishin “të lidhura me punimet”.

Nën presionin e Organizatës Ndërkombëtare të Punës, në vitin 2017, Katari u zotua se do t’i përmirësonte kushtet për punëtorët, nisur nga kufizimi i orëve të punës deri te rritja e standardeve në kampet ku jetojnë. Organizata për të drejtat e njeriut, Amnesty International, me seli në Londër, thotë se “punëtorëve në Katar u janë njohur disa të drejta, por situata ende është larg objektivave”.

Vazhdojmë të shohim mijëra punëtorë që përballen me abuzim e shfrytëzim shumë të rëndë në punë. Ndër problemet e mëdha, vjedhja e pagave. Ndonjëherë, punëtorët nuk paguhen me muaj të tërë. Po ashtu kemi dokumentuar raste kur emigrantë roje të sigurisë, detyrohen të punojnë deri në 12 orë në ditë, çdo ditë të javës e pa një ditë pushimi për muaj me radhë, pasi punëdhënësit i kërcënojnë me gjoba. Problem i madh është se në shumë raste, Katari nuk i heton vdekjet e punëtorëve emigrantë e familjarët e viktimave, nuk përfitojnë dëmshpërblim.

Por, për “skuadrën e abuzuar” kanë ngritur zërin edhe shoqata europiane të futbollit e vetë lojtarët, të cilëve FIFA iu kërkoi “të fokusohen në futboll”. Sipas kreut të saj, Gianni Infantino, “sporti nuk duhet të japë mësime morale”, një mesazh të cilin e përsëriti edhe dje.