Studimet e mëparshme kanë treguar se bashkëshortët mund të ndikojnë në shëndetin dhe jetëgjatësinë e njëri-tjetrit. Me këtë studim kuptojmë se si një burrë mund të përfitojë nga të paturit një grua kontrolluese. Gratë ‘e bezdisura’ mund të jenë të mira për burrat e tyre. Së fundmi rezulton se kur burrat kontrollohen nga gratë e tyre, kanë një rrezik më të ulët të zhvillimit të diabetit, sipas një studimi të udhëhequr nga një sociolog i Universitetit Shtetëror të Miçiganit.

Hui Liu, hulumtuesi kryesor, tha se kjo mund të jetë për shkak të faktit se disa gra monitorojnë vazhdimisht shëndetin e burrave të tyre, veçanërisht nëse ata janë me shëndet të dobët ose kanë sëmundje si diabeti, që kërkojnë monitorim të shpeshtë. Megjithatë, burrat mund të ndihen të pakënaqur kur gratë u thonë atyre se çfarë të bëjnë, gjë që ata mund ta shohin si bezdisje.

Një martesë e mirë do të nënkuptonte një rrezik më të ulët për probleme shëndetësore. Gratë mund të jenë më të ndjeshme se burrat ndaj cilësisë së një marrëdhënieje dhe kështu kanë më shumë gjasa të përjetojnë një përmirësim shëndetësor nga një marrëdhënie cilësore, thonë studiuesit.

Kontrolli i tepërt mund të krijojë gjithashtu stres dërrmues për bashkëshortët. Shumë studime kanë treguar se martesat stresuese mund të jenë të këqija për trupin, zemrën dhe mendjen. Një studim i veçantë ndoqi rreth 10,000 danezë, për 11 vjet dhe arriti në përfundimin se ata me partnerë kontrollues kishin një rrezik 50%-100% më të lartë të vdekshmërisë së hershme sesa ata që bënin jetë më paqësore.

Rikujtojmë se, hulumtimet tregojnë se familja brenda së cilës edhe bashkëshorti kujdeset për punët e shtëpisë si edhe për fëmijët ka më shumë shanse të mbijetojë më gjatë. Rezultatet e studimit të kryer në mijëra çifte britanike, do të jenë ato që çdo bashkëshorte do të donte që të dëgjonte. Pasi kanë analizuar të dhënat, është bërë e qartë që burrat të cilët ndihmojnë më shumë kanë martesa më jetëgjata.