Edhe pas projektit të dështuar dy vite më parë, vullneti për krijimin e Superligës nuk është zbehur. Shefi ekzekutiv i A22, Bernd Reichart ka njoftuar një plan të ri që rikthen idenë e krijimit të një kompeticioni europian të klubeve, këtë herë duke synuar një gamë shumë më të gjerë skuadrash. E gjithë kjo mbështetet nga Real Madrid, Barcelona e Juventus, tre klubet që do të kishin dashur të nisnin projektin e parë. Formati i kompeticionit nuk është bërë ende i ditur, por janë kontaktuar të paktën 50 klube, me synimin për të arritur maksimumi tetëdhjetë pjesëmarrës.

Tetorin e kaluar filluam një dialog të hapur për të ardhmen e futbollit europian të klubeve. Që atëherë, ne kemi folur me pothuajse 50 klube europiane dhe palë të tjera të interesuara. Shumica dërrmuese ndan vlerësimin se themelet e futbollit europian janë në rrezik. Eshtë koha për një ndryshim. Futbolli i klubeve europiane është në një pikë kthese.

Pabarazitë e mëdha janë shfaqur në të gjithë kontinentin dhe klubet me tradita të lavdishme nuk janë më në gjendje të konkurrojnë. Klubet marrin përsipër të gjitha rreziqet e sipërmarrjes, por shumë shpesh detyrohen të qëndrojnë mënjanë kur merren vendimet kryesore dhe shohin që themelet e tyre sportive dhe financiare të shemben. Diskutimet tona e bënë të qarta se klubet shpesh nuk janë në gjendje të flasin publikisht kundër një sistemi ku kërcënimi i sanksioneve përdoret për të goditur opozitën.

Në fund të këtij viti, Gjykata e Drejtësisë së Bashkimit Europian do të vendosë për ligjshmërinë dhe përputhshmërinë e monopolit të UEFA-s me liritë, parimet dhe vlerat themelore të BE-së. Vendimi i tyre nuk do të ndikojë vetëm në futboll, por në të gjitha sportet europiane. Qëllimi ynë është të paraqesim një plan të qëndrueshëm sportiv për garat europiane të klubeve, i cili është i disponueshëm të paktën për të gjithë 27 anëtarët e BE-së. Sot prezantojmë rezultatet paraprake të fazës së parë të dialogut tonë, i cili ishte i sinqertë, i drejtpërdrejtë dhe konstruktiv.

Dolën përfundime të qarta në lidhje me nevojën për ndryshim dhe blloqet ndërtuese se si të realizohet. Ende ka shumë punë për të bërë dhe dialogu do të vazhdojë. Po hyjmë në fazën vendimtare për qeverisjen e ardhshme të futbollit europian të klubeve.