Gazetari Poli Hoxha tha në një intervistë për Euronews Albania se pista politike është ajo më e dobëta në vrasjen e biznesmenit Ardian Nikulaj në Shëngjin.

Hoxha u shpreh se nisur nga mënyra si është ekzekutuar 50-vjeçari tregon se atentati është e parapërgatitur shumë kohë më parë.

“Pista politike është më e dobëta, në mes janë të gjitha problemet që ka pasur më parë viktima, që nga gjakmarrja deri te ngjarjet e rëndë kriminale ku mund të jetë përfshirë. Ka qenë edhe drejtues i ALUIZNI dhe e dimë problemin e pronave në Lezhë. Por mënyra se si është organizuar atentati tregon se është i përgatitur edhe muaj më përpara. Kjo pasi kishim të bënim me një njëri që lëvizte me makina të blinduara, rrinte vetëm në lokalin e tij dhe me njerëzit e tij. Atentati është planifikuar shumë kohë më parë”, tha gazetari.