Për sot, Izraeli është përgatitur për protesta dhe greva të reja, pas një votimi parlamentar përçarës të reformave të kundërshtuara në gjyqësor e që po ndajnë vendin, si dhe kanë nxitur kritika nga aleatët e huaj.

Vendimi i qeverisë së djathtë të kryeministrit Benjamin Netanyahu, për të përmbushur një pjesë kyçe të reformave, tashmë ka nxitur sfida ligjore e përleshje në rrugë.

Kundërshtarët do të vazhdojnë protestat, ndërsa mjekët pritet të hyjnë në grevë. Shoqata e Avokatëve të Izraelit është në mesin e një numri të madh grupesh që nisën peticione në Gjykatën e Lartë, me qëllimin për të rrëzuar ligjin e ri. Gazetat shkruanin:

Ditë e zezë për demokracinë e Izraelit!

Protestuesit qëndruan në rrugë deri natën vonë pas votimit. Studenti Josh Hakimi tha se ndihej “shumë, shumë i pikëlluar për atë që po ndodh në Izrael”.

58 persona u arrestuan gjatë protestave. Policia përdori pompa uji për të shpërndarë protestuesit në një rrugë kryesore në Tel Aviv, ku turma valëviste flamujt izraelitë.

Opozita e kritikoi kryeministrin “kukull”

Netanyahu dështoi t’i qetësonte kundërshtarët me një paraqitje televizive në mbrëmje vonë. Ai u zotua për bisedime edhe kur Parlamenti të marrë pushimet. Kryeministri i sfiduar tregoi shenja plogështie në Parlament teksa qëndronte i ulur mes ministrave të Drejtësisë e Mbrojtjes. Më herët iu nënshtrua një operacioni në zemër.

Netanyahu mbrojti ligjin e ri, që i kufizon pushtetin Gjykatës së Lartë. Sipas tij, ky është “hap i nevojshëm demokratik”.

Ndasitë e thella brenda koalicionit të tij dhe protesta masive e detyruan kryeministrin që ta ndalte përkohësisht procesin legjislativ në muajin mars, por brenda pak javësh politikanët fajësuan njëri-tjetrin për dështimin e bisedimeve. Ndërkaq, ligji shumë i kontestuar kaloi me 64 vota pro dhe opozita nuk pranoi ta votonte. Shefi i opozitës izraelite, Yair Lapid kritikoi atë që e quajti “paraqitje e dobët e Netanyahut”.