Sipas modeleve shkencore, një incident i rëndë bërthamor në termocentralin Zaporizhia ka të ngjarë të prekë natyrën dhe bujqësinë në vendet fqinje. Eksperti austriak, Nikolaus Mullner paraqiti një raport të përkohshëm mbi kërkimin e bërë prej tij.

Modeli i Mullner sugjeron që një zonë prej 20-30 kilometrash rreth uzinës së pushtuar nga Rusia ka të ngjarë të jetë e kontaminuar me cezium, duke bërë të nevojshme një zonë të kufizuar.

Ekziston një probabilitet më i vogël që kjo zonë të shtrihet deri në 200 kilometra në drejtime të caktuara. Studimi u porosit nga Mjekët Ndërkombëtarë për Parandalimin e Luftës Bërthamore (IPPNW).

Po ashtu, Mullner llogariti përhapjen e niveleve të rritura të radioaktivitetit që mund të mos rezultojë në zona të kufizuara, por mund të çojë në kufizime në bujqësi e peshkim, si dhe kufizime në konsumin e kërpudhave e të mishit të kafshëve të egra.

Ukraina, si dhe vendet fqinje si Rusia apo Moldavia ka të ngjarë që të preken. Me një probabilitet më të ulët që varion nga 1 në 100, në 3 në 100, pasoja të tilla mund të ndodhin gjithashtu në Poloni, Sllovaki, Republikën Çeke, Hungari ose Rumani.

Megjithatë, modeli tregon se Gjermania dhe vendet e tjera europiane më në perëndim, nuk do të përballeshin me këtë rrezik.

Për analizën e tij, studiuesi i Universitetit të Burimeve Natyrore dhe Shkencave të Jetës në Vjenë supozoi se një e pesta e materialit radioaktiv do të çlirohej nga një prej gjashtë njësive të reaktorëve gjatë luftimeve për kontrollin e objektit. Ende nuk janë llogaritur pasojat specifike shëndetësore për popullatën e prekur.

Termocentrali bërthamor i Zaporizhias ka qenë nën pushtimin rus që nga marsi i vitit 2022. Që atëherë, termocentrali dhe linjat e energjisë për sistemet e ftohjes janë dëmtuar disa herë gjatë thellimit të armiqësive, por nuk janë raportuar rrjedhje rrezatimi. Ukraina dhe Rusia fajësojnë njëra-tjetrën për incidentet.