Ministri i Brendshëm, Taulant Balla reagoi për plagosjen e efektivit të policisë, Redin Çaushaj, i cili po lufton për jetën në spital, i plagosur mbrëmë me mjet prerës pasi ndërhyri për të shuar një konflikt në Pilur të Himarës. Këtë e bëri edhe pse nuk ishte në shërbim. Balla paralajmëron se kushdo që guxon të ngrejë dorë kundër një punonjësi policie duhet ta dijë mirë se po kryen një krim të rëndë kundër shtetit.

MESAZHI I PLOTË:

🦅👨‍✈️ Prej mbrëmë, pak para mesnate, një nga djemtë e rinj dhe të përkushtuar të Policisë së Komisariatit Himarë, Redin Çaushaj, po lufton për jetën në Reanimacionin e Spitalit Vlorë. Mjekët dhe infermieret e këtij spitali kanë bërë më të mirën dhe gjendja shëndetësore e Redianit, edhe pse vazhdon e rëndë, po shfaq përmirësime dhe është stabël për momentin.

Redin Çaushaj mban detyrën e inspektorit në Policinë e Shtetit dhe dje edhe pse jashtë orarit të shërbimit është përpjekur të bëjë detyrën duke ndërhyrë për shuarjen e një konflikti mes dy shtetasve, siç jam informuar menjëherë mbrëmë nga Drejtori i Përgjithshëm.

Në këtë përpjekje të punonjësit të policisë, njëri nga shtetasit e ka goditur me armë të ftohtë duke e plagosur rëndë. Autori i këtij krimi është arrestuar sot në të gdhirë nga forcat tona të Policisë së Shtetit dhe pres nga Prokuroria Vlorë të bëjë një hetim të plotë, të pavarur dhe një ndëshkim të ashpër për fajtorin.

Kushdo që guxon të ngrejë dorë kundër një punonjësi policie duhet ta dijë mirë se po kryen një krim të rëndë kundër shtetit. Do të flas në një moment të dytë sot për këtë çështje.

Redini do të vazhdojë të qëndrojë në Reanimacionin e Spitalit Vlorë, pas konsultimit që patëm me mjekët dhe drejtuesit e Spitalit🙏

Pas 8 orësh ndjekje, u lokalizua u kap dhe u vu në pranga 60-vjeçari Theodhori Mërkuri. Agresori u gjet i fshehur në ambientet e ish-repartit ushtarak në fshatin Pilur. Me të u prangos dhe një 39-vjeçar, i akuzar për moskallëzim të krimit. Operacioni u krye nga blutë e Himarës e të Vlorës, si dhe nga Forcat e Ndërhyrjes së Shpejtë, FNSH.