Shumica e muzikës më të dëgjuar që doli në vitet ’90 dhe fillimi deri në fund të viteve 2000 ishte nga grupet e djemve. Disa nga grupet e djemve që mbahen mend mirë janë Boyz II Men, Backstreet Boys, N*SYNC, Linkin Park, O-town, New Kids on the Block, Jonas Brothers dhe One Direction.

Pasi shumë nga këto grupe djemsh i dhanë fund grupit të tyre, artistët solo filluan të dominojnë industrinë e muzikës. Megjithatë, që nga viti 2015, ka pasur disa grupe djemsh që janë krijuar dhe tani prodhojnë muzikë për të cilën mund të mos keni dëgjuar kurrë: In Real Life, New Hope Club, Pretty Much, RoadTrip dhe Why Don’t We.

Duket sikur nuk mund t’i themi kurrë lamtumirë grupeve të djemve. Dy dekada pasi ‘N Sync dhe Backstreet Boys dominuan botën e argëtimit, grupet e djemve po rikthehen.

Të kujton një kohë kur N*SYNC luftonte me Backstreet Boys si akti më i mirë i muzikës, duke shitur miliona albume dhe bileta koncertesh, falë miliona vajzave që investuan kohë, paratë e prindërve të tyre dhe brohorisnin për grupin e tyre të preferuar të djemve. N*SYNC dhe Backstreet Boys, të cilët u bënë të famshëm në vitet 1990 dhe e mbajtën atë gjatë mijëvjeçarit të ri, u pasuan nga grupe të tjera të suksesshme djemsh, si 98 Degrees, O-Town dhe Dream Street. Para kësaj, ishte New Edition që shpërtheu në skenë në vitet 1980, ndjekur nga suksesi masiv i New Kids on the Block.

E tashmë, lajmi që ka bërë më shumë bujë javët e fundit, është ribashkimi i grupit N*SYNC pas më shumë se dy dekadash. Madje jo vetëm kaq, por edhe pak ditë na ndajnë nga projekti i tyre i ri muzikor. Kënga e tyre e fundit, “Better Place”, do të publikohet në fund të këtij muaji dhe është shkruar posaçërisht për filmin e ri të anëtarit të NSYNC, Justin Timberlake, “Trolls Band Together”. E sigurisht fansat janë ‘çmendur’ nga ky lajm. Jo vetëm dashamirësit e grupit të asaj kohe, por edhe brezi më i ri që ka dëgjuar këngët e tyre ndër vite, mezi po e presin këtë çast.

N*SYNC nuk janë të vetmit artistë të muzikës pop që po rikthehen pas shumë vitesh. Take That duket se po ngacmon kuriozitetin e fansave një turne të ardhshëm kryesor në Mbretërinë e Bashkuar. Grupi, i përbërë nga Gary Barlow, Howard Donald dhe Mark Owen, do të rikthehet sot, më 22 shtator, me këngën e tyre të parë të re në pesë vjet, “Windows”. Përpara mbërritjes së këngës, logoja zyrtare e grupit të treshes është projektuar në stadiume dhe arena në të gjithë Mbretërinë e Bashkuar, duke sugjeruar se një seri e madhe datash është gati të shpallet.

Teksa brezi më i ri, (ende në të 20-at tona) kur përmendet emri i James Blunt, e lidhim direkt me hitin “You’re Beautiful”. Nuk ka rëndësi sa dhjetra e dhjetra hite ai ka nxjerrë, pikërisht kjo këngë na njohu fillimisht me këtë artist dhe dashuria sa erdhi duke u rritur. James Blunt është rikthyer me një album të ri të shkëlqyeshëm me titullin “Who We Used To Be”, i cili vjen më 27 tetor përmes Atlantic Records.

James Blunt është bërë diçka si një thesar kombëtar ndërsa i afrohet 20-vjetorit të albumit të tij debutues të vitit 2004 “Back to Bedlam”, i cilësuar si një nga 10 albumet më të shitur të asaj dekade. Albumi përmban këngët “Goodbye My Lover” dhe hitin 3 herë të nominuar për Grammy, “You’re Beautiful”. P.S: kanë kaluar rreth 17 vite që nga “Goodbye My Lover”… Ndiheni të vjetër?

Herë pas here, vjen një grua kaq e jashtëzakonshme, saqë ajo krijon botën e muzikës pop në imazhin e saj. Nëse gjithçka shkon mirë, ajo qëndron kështu për vite – madje edhe dekada – ndërsa ajo zhvendoset dhe formohet në diçka të re. Në mënyrë tipike, këto gra që qëndrojnë për një periudhë të gjatë në industrinë e muzikës, janë prirur të jenë eponime, të tilla si Cher dhe Madonna. Kohët e fundit, ky lavdërim i është bërë (me të drejtë) Kylie Monogue, e cila në moshën 55-vjeçare ka vazhduar t’i shërbejë pasurisë së fansave që ajo ka krijuar.

Këtë vit, kjo nënkupton publikimin e albumit të saj të gjashtëmbëdhjetë në studio, “Tension”. Tre vjet pas daljes së saj të fundit, ajo mbajti në pëllëmbë të duarve listat ndërkombëtare me hitin e saj surprizë të verës, “Padam Padam”. Kudo, nga baret lokale të homoseksualëve deri në rrugë e luanin këngën në mënyrë të përsëritur, duke nxitur tendencat sociale dhe duke e vendosur Kylie përsëri në krye të listave të Britanisë së Madhe dhe SHBA-së.

Por mjaft me pop-in! E mbani mend kur thamë se rock-u po ringjallet? Blink-182 mori hapin e radhës. Grupi është rikthyer së bashku dhe tani Mark Hoppus, Tom DeLonge dhe Travis Barker po publikojnë albumin e tyre të parë të ri së bashku pas 12 vitesh. “One More Time” do të dalë më 20 tetor. Barker tha se albumi i ri ishte pjesërisht i frymëzuar nga disa nga tragjeditë që anëtarët kanë duruar gjatë viteve. Ai tha:

Në albumin “One More Time” është shkruar se pse duhen këto katastrofa, si unë në një aksident avioni, ose Marku i sëmurë, që grupi ynë të ribashkohet.

Po ashtu, ikonikët The Rolling Stones do të publikojnë albumin e tyre të parë në studio që nga viti 2005. Së fundmi grupi ngacmoi kuriozitetin e fansave me muzikën e re në gazetën britanike Hackney Gazette. Reklama përfshinte një faqe interneti dhe një numër telefoni, i cili zbuloi një regjistrim që thoshte: “Mirë se erdhe në Hackney Diamonds, specialistë në riparimin e xhamave. Mos u zemëro, rregulloje. Hapja në fillim të shtatorit, Rruga Mare, E8…” Albumi i ri titullohet “Hackney Diamonds”.

Bateristi i ndjerë i Stones, Charlie Watts vdiq në gusht 2021. Albumi i ri do të përfshijë muzikën që grupi bëri me Watts para vdekjes së tij dhe do të shfaqë Paul McCartney duke luajtur bas në një këngë.

Meqë ra fjala, e dinit që dikur aktori Keanu Reeves ka qenë pjesë e një grupi muzikor?! Dogstar, grupi alternativ-rock i viteve ’90 me basistin e famshëm dhe yllin e filmave Keanu Reeves, janë rikthyer zyrtarisht me një këngë të re, një album të ri dhe shumë data të turneut të tyre. Kënga e tyre e re, “Everything Turns Around”, është një pjesë e ndritshme e tinhujve të mirë rock and roll, me sasinë e duhur të ‘deformimit’. Kënga do të shfaqet në albumin e parë të grupit në më shumë se 20 vjet, “Somewhere Between the Power Lines and Palm Trees”, i cili vjen më 6 tetor nëpërmjet labelit të tyre, Dillon Street Records. Në një deklaratë, Dogstar tha për melodinë e re:

Ndihet si një këngë argëtuese verore për ne. Ka një mesazh ngritës dhe një atmosferë pozitive që shpresojmë ta bëjë ditën tuaj pak më të lehtë. Është një nga këngët tona të preferuara për t’u luajtur live dhe mezi presim ta ndajmë me ju në turneun tonë të ardhshëm.

Dogstar u formua në fillim të viteve ’90, formacioni origjinal që përfshin Reeves si basist, bateristin Robert Mailhouse, kitaristin Bret Dormouse dhe kitaristin/vokalistin kryesor Gregg Miller. Miller përfundimisht u largua nga grupi dhe Dormouse mori përsipër detyrat vokale. Në vitin 1996, Dogstar publikoi një EP, “Quattro Formaggi”, si dhe albumin e tyre debutues, “Our Little Visionary”. Një album i dytë, “Happy Ending”, pasoi në 2000, por Dogstar u nda disa vjet më vonë.

Dhe erdhi momenti të flasim për një grup vajzash. Duket se grupi i famshëm Spice Girls, do të jenë sërish bashkë për një projekt, sepse Mel B e ka konfirmuar për The Sun. Ky do të jetë takimi i tyre i parë në 11 vitet e fundit, që nga performanca e tyre në ceremoninë e mbylljes së Lojërave Olimpike në Londër në vitin 2012. Victoria Beckham nuk donte të bashkohej me yjet e saj në turneun e tyre në Mbretërinë e Bashkuar në vitin 2019, duke thënë në atë kohë se ajo ishte shumë e zënë me markën e saj të veshjeve. Por Mel tani thotë se Victoria ka pranuar të bashkohet.

Ne po planifikojmë të bëjmë një deklaratë publike. Ne jemi duke finalizuar marrëveshjet përfundimtare se çfarë do të bëjmë së bashku. Gjithçka që mund të them është se do të jetë diçka që fansat me të vërtetë do ta duan.

Tani natyrshëm lind pyetja, çfarë po ndodh me muzikën? Pse u desh të kalonin 20 vite që të kishim një rikthim të disa prej emrave më të njohur të muzikës? Një rikthim aty ku nisi gjithçka! Duhet thënë se përveç se është një mundësi mjaft e mirë për t’u ‘çmallur’ me ikonikët e ‘muzikës cilësore’, ku duket si një shans për brezin më të ri që nuk i kanë përjetuar ato kohë.

Le ta pranojmë, mbase një pjesë e mirë e atyre që po e lexojnë tashmë këtë artikull, jo vetëm që nuk i kanë jetuar këto ‘epoka’, por as nuk i kanë dëgjuar këta artistë dhe të gjitha hitet e tyre. Megjithatë, e sigurtë është kjo… Duhet ta dini që pikërisht këta që përmendëm më sipër, kanë qenë idhujt e prindërve, apo e motrave apo vëllezërve tuaj më të mëdhenj. Ndoshta kjo është dhe interesantja e gjithë kësaj. Të jeni adhurues të muzikës së dikurshme, të ringjallur ditët e sotme!