Kur njeriu vdes, indet e tij të buta dekompozohen shpejt dhe me kalimin e kohës ajo që mbetet janë kockat dhe dhëmbët. Sidoqoftë, në kushte të veçanta, ose pas ndërhyrjes njerëzore, një trup mund t’i nënshtrohet procesit të njohur si mumifikimi, pas të cilit indet e tij të buta mund të ruhen. Megjithatë, që kjo të ndodhë në kushte natyrore, nevojiten kushte të veçanta meteorologjike dhe klimatike, si dhe pak kohë javë, ose muaj.

Kjo është arsyeja pse zbulimi në Bullgari i trupit të mumifikuar të një njeriu që kishte humbur jetën vetëm 16 ditë më parë bëri bujë sesi arriti të ruhej kaq mirë. Më 3 shtator 2023 në Sofje, Bullgari, një trup njeriu u gjet në lëndinat pranë një linje hekurudhore. Pranë trupit ishte çanta e tij, e mbushur me sende personale dhe një shishe pije alkoolike. Policia zbuloi se kufoma ishte e një 34-vjeçari, i cili për herë të fundit ishte parë i gjallë më 18 gusht 2023.

Ajo që tërhoqi vëmendjen ishte fakti se kufoma e tij ishte mumifikuar natyrshëm. Që ky proces të zhvillohet, moti duhet të jetë shumë i nxehtë dhe shumë i thatë. Duhet gjithashtu ekspozim i fortë dhe i vazhdueshëm ndaj dritës së diellit dhe erërat e forta mund të ndihmojnë në përshpejtimin e procesit. Megjithatë edhe në të gjitha këto kushte, trupit të njeriut i duhet kohë për t’u mumifikuar.

Studimi thotë se duhen disa javë dhe në disa raste edhe muaj apo vite. Një kontroll i motit në javët para zbulimit të trupit të mumifikuar konfirmoi se kushtet nuk ishin të favorshme për procesin. Temperatura ra nën 20°C disa herë dhe lagështia mesatare e regjistruar ishte rreth 52%. Por si arriti trupi të ruhej në atë mënyrë? Një hipotezë është se era e ngritur nga trenat që kalonin kontribuoi në avullimin e shpejtë të lëngjeve trupore, duke favorizuar mumifikimin, por kjo gjithashtu nuk shpjegon temperaturat teorikisht shumë të ulëta. Me pak fjalë, mumja e Sofjes është ende një mister.