Organizata e Bashkëpunimit Islamik ka denoncuar komunitetin ndërkombëtar për “mosndëshkimin”  në luftën në Gaza. Ata fajësojnë Izraelin për sulmin në spitalin Al-Ahli që vrau 471 njerëz, sipas ministrisë së shëndetësisë së Gazës. Deklarata e OIC u publikua pas një takimi urgjent të ministrave të jashtëm.

Blloku 57-anëtarësh i vendeve me shumicë myslimane tha gjithashtu se “dënon qëndrimet ndërkombëtare që mbështesin agresionin brutal kundër popullit palestinez dhe i japin Izraelit pandëshkueshmërinë, duke përfituar nga standardet e dyfishta që ofrojnë mbulesë për fuqinë pushtuese”, thuhet në deklaratë.

E njëjta deklaratë fajësoi Izraelin për një sulm me raketa ndaj Spitalit Ahli Arab të Gazës, i drejtuar nga të krishterët, që vrau 471 njerëz sipas ministrisë së shëndetësisë së Gazës.

Sulmi erdhi pasi Izraeli vazhdoi të lëshonte bomba në Gaza në përgjigje të sulmit të përgjakshëm të 7 tetorit nga Hamasi.

OIC, me qendër në qytetin bregdetar saudit të Jeddah, i bëri thirrje komunitetit ndërkombëtar “të mbajë përgjegjësinë e okupimit izraelit për këto krime të tmerrshme lufte kundër popullit palestinez”.

OIC dënon gjithashtu Këshillin e Sigurimit të Kombeve të Bashkuara për dështimin në ndalimin e dhunës.