Ministri i Drejtësisë Ulsi Manja ka takuar disa shqiptarë të dënuar në burgjet angleze.

Manja bisedoi me një grup prej 18 të dënuarish në Pentonville. Të dënuarit shprehën shqetësimet e tyre lidhur me asistencën me përkthimin në gjuhën shqipe, librat shqip, takimet me familjarët dhe respektimi i orëve të ajrimit.

Sipas Manjës, të dënuarit shqiptarë shprehën interes për marrëveshjen e transferimit të tyre për të vuajtur pjesën e mbetur të dënimit në Shqipëri.

“Pas takimit, patëm mundësinë që shqetësimet e tyre t’i bisedonim jo vetëm me autoritetet e burgut në Pentonville, por dhe me Damian Hinds, Ministrin e Shtetit për Burgjet, për ta adresuar trajtimin e tyre në nivel të të gjitha burgjeve në Mbretërinë e Bashkuar.

U dakordësuam për një projekt të shpejtë midis Drejtorisë së Përgjithshme të Burgjeve dhe autoriteteve britanike që menaxhojnë burgjet, për sjelljen e librave në gjuhën shqipe në çdo burg ku aktualisht ka shqiptarë të dënuar dhe të paraburgosur.

Projekti i edukimit dhe rehabilitimit të tyre dhe mundësia për të ruajtur kontaktet me familjet e tyre në Shqipëri do të jetë pjesë e një projekti në vazhdim, pas zbatimit të marrëveshjes së transferimit”.

Në Pentonville, vuajnë dënimin e tyre rreth 60 shqiptarë.

Një ditë më parë, ministri anglez i drejtësisë Alex Chalk dhe ai shqiptar Ulsi Manja firmosën marrëveshjen për transferimin e të burgosurve shqiptarë për vijimin e vuajtjes së dënimit në burgjet shqiptare.

Në marrëveshje parashikohet se çdo ditë burg e të transferuarve nga burgjet britanike do ta paguajë pala angleze. Përllogaritet se në afatin dy vjeçar të kësaj marrëveshje pala britanike do të paguajë 20 milion stërlina.

Parashikohet transferimi i të gjithë atyre shqiptarëve që kanë për të vuajtur më shumë se katër vite burg. Deri më tani, kanë aplikuar për t’u transferuar 48 të burgosur shqiptarë. Parashikohet se me këtë marrëveshje me afat kohor dy vjeçar të transferohen 200 shtetas shqiptarë mes tyre 17 të burgosur me burgime të përjetshme për vrasje.