Tai chi mund të ndihmojë në ngadalësimin e simptomave të sëmundjes së Parkinsonit për disa vite, sugjeron një studim kinez. Ata që praktikonin artin marcial dy herë në javë kishin më pak komplikime dhe cilësi më të mirë të jetës sesa ata që nuk e praktikonin. Parkinsoni është një sëmundje progresive e trurit e cila çon në dridhje dhe lëvizje të ngadalshme dhe nuk ka shërim. Ekspertët thonë se gjetjet mbështesin studimet e mëparshme mbi përfitimet e stërvitjes për ata me Parkinson. Studimi, nga Shkolla e Mjekësisë e Universitetit të Shanghait Jiao Tong, monitoroi shëndetin e qindra pacientëve me Parkinson për deri në pesë vjet.

Një grup prej 147 personash praktikonin Tai chi të rregullt ndërsa një grup tjetër prej 187 nuk e praktikonin. Ushtrimi tradicional kinez kombinon lëvizjet e ngadalta dhe të buta me frymëmarrje të thellë dhe relaksim. Organizata bamirëse Parkinson’s UK e përshkruan Tai chi-në si një aktivitet fizik me intensitet të ulët që mund të ndihmojë në ngritjen e humorit dhe t’ju ndihmojë të jetoni mirë.

Studiuesit zbuluan se sëmundja përparonte më ngadalë në grupin Tai chi në matjet e simptomave, lëvizjes dhe ekuilibrit. Ky grup gjithashtu pa më pak dhimbje shpine dhe marramendje, më pak probleme me kujtesën dhe përqendrimin se në grupin tjetër. Në të njëjtën kohë, gjumi dhe cilësia e jetës përmirësoheshin vazhdimisht.

Prof. K.Ray Chaudhuri, profesor i çrregullimeve të lëvizjes dhe neurologjisë në King’s College në Londër, tha:

Efektet pozitive në aspektet e funksioneve motorike dhe jo motorike janë mbresëlënëse. Ne tashmë rekomandojmë Tai chi, si dhe forma të tjera ushtrimesh, por të kuptuarit se cilat forma të ushtrimit janë më të dobishmet është një qëllim i rëndësishëm për të përmirësuar menaxhimin afatgjatë të pacientëve.

Një studim i zhvilluar në Britani të Madhe tregon se të dhënat e marra nga orët inteligjente të përdorura nga pjesëmarrësit mund të ndihmojnë në diagnostikimin e sëmundjes së Parkinsonit deri në 7 vjet më pare. Sipas “Sky News”, studiuesit nga Instituti i Kërkimeve të Dementisë në Britani në Universitetin e Cardiff-it kanë përcaktuar se orët inteligjente mund të luajnë rol të rëndësishëm në diagnostikimin e hershëm të Parkinsonit.