Një ngjarje tragjike ka ndodhur në SHBA ku një nënë ka përplasur vazhdimisht vajzën e saj në trotuar, duke e lënë të vdekur. 21-vjeçarja është dënuar me burgim të përjetshëm, pa mundësinë e lirimit me kusht për vrasjen e saj. “Makaylia Jolley, 21-vjeçe, nga Misisipi, SHBA, kapi vajzën e saj dy muajshe Khalysie nga kyçet e këmbëve, e përplasi në trotuar disa herë dhe më pas e braktisi”,-tha ndihmësprokurorja e qarkut Kathryn Newman. Ngjarja ka ndodhur në Pearl City më 12 maj 2022. Jolley pas aktit të saj të neveritshëm vrapoi për t’u fshehur në pyllin aty pranë, ku u kap pak kohë më vonë. Foshnja u dërgua në spital, por pas dy ditësh humbi jetën nga plagët e marra.

Ajo pësoi ënjtje dhe gjakderdhje të trurit, fraktura të gjera të kafkës, thyerje të gishtit të madh të majtë dhe të djathtë, çarje dhe gjakderdhje në sy. Nëna u deklarua fajtore për vrasje të shkallës së parë. Prokurori fillimisht kishte kërkuar dënimin me vdekje, por në vend të kësaj i ofroi Jolley-t një marrëveshje për pranimin e fajësisë. Jolley thuhet se ka rrëfyer se ka goditur foshnjën e saj, por tha se ishte një aksident dhe ajo nuk e dinte pse e bëri këtë. Autoritetet thanë se nëna kishte përdorur drogë mëngjesin e incidentit.