Në një zhvillim të bujshëm, Dritan Rexhepi, i njohur si “mbreti shqiptar i kokainës” u arrestua në Stamboll të Turqisë nga policia turke në kohën kur ka qenë në kërkim ndërkombëtar nga Italia e Shqipëria. Mësohet se ai mbante pasaportë false me emrin e rremë Benjamin Omar Perez Garcia.

Rexhepi u prangos gjatë një operacioni kundër kartelit të quajtur “Kompania Bello”, i cili transportonte drogë nga Amerika e Jugut për në vendet e Europës. Paraprakisht, raportohet se u kap si rezultat i punës së përbashkët të kryer nga drejtoritë e Luftës ndaj Krimeve Narkotike, të Inteligjencës, kundër Trafikimit të Emigrantëve e Kalimeve Kufitare, si dhe shkëmbimit të informacionit me policinë italiane.

Autoritetet në vendin tonë e në atë fqinj e kërkonin për “Vrasje me dashje”, “Trafik drogr”, “Rrëmbim”, “Falsifikim” dhe për “Mbajtje armësh e municionesh”.

Ministri turk  i Punëve të Brendshme, Ali Yerlikaya bëri të ditur se është konstatuar se Rexhepi ka hyrë në Turqi nga aeroporti i Stambollit me pasaportë kolumbiane, i regjistruar në emrin Benjamin Omar Perez Garcia. Zyrtari i qeverisës së Ankarasë shtoi se janë marrë masa për këtë çështje.

Ministri Yerlikaya, i cili njoftoi për operacionin policor në llogarinë e tij në rrjetet sociale, deklaroi se policia e Stambollit arrestoi liderin e kartelit në Beylikdüzü, si rezultat i ndarjes së informacionit me policinë italiane. Ndërkaq, u zotua për intensifikim të përpjekjeve kundër formave të ndryshme të krimit.

Lufta jonë kundër trafikantëve të drogës dhe organizatave të krimit të organizuar do të vazhdojë të rritet me vendosmëri.