Nëse më para botoksi dhe ndërhyrjet estetike për të korrigjuar hundën, veshët etj., ishin ndryshime që lidheshin zakonisht me gratë, në ditët e sotme duket se burrat nuk përbëjnë përjashtim.

Vetëm disa ditë më parë, Arjan Konomi pranoi se “kanë ndodhur disa ndryshime” në portretin e tij.

I ftuar te “Rudina”, ai u shfaq me një pamje ndryshe nga çfarë ishim mësuar ta shihnim kohëve të fundit gjatë udhëtimeve nëpër botë. Ai tregoi se ka mbjellë flokët dhe ka “prekur” disa gjëra në fytyrë, pa u ndalur konkretisht në detaje.

Në një intervistë për “E diela jonë” në RTSH me moderatorin Ermal Peçi, aktori Erion Isai pranoi se gjatë periudhës së gushtit vendosi të kryente një ndërhyrje për të korrigjuar hundën dhe veshët.

Pak kohë më parë, gazetari Bledi Strakosha pranoi te “Rudina” se ka bërë botoks dhe nuk ka turp ta tregojë.

“Kam bërë dy herë botoks dhe nuk kam turp ta them. E kam bërë për të ndërhyrë pak në rrudhat e shprehisë në ballë dhe te sytë. Unë kam edhe një problem, qeset poshtë syve. Më sugjeruan që t’i hiqja dhe ato, por nuk pranova, sepse doja ta njihja veten kur të dilja para pasqyrës,” tha ai.

Në vitin 2017, Agron Llakaj provoi trendin të botoksit, por vetëm për të mos e bërë kurrë më. I ftuar në “Xing me Ermalin”, Llakaj tregoi se pasi bëri botoks në fytyrë, nuk e njihte veten. Fytyra i kishte ngrirë, vetullat i qëndronin lart dhe shkurt dhe kuptoi që kjo punë s’bënte për të. Humoristi e konsideroi botoksin ide jo të mirë sepse rolet e tij kanë shumë të rëndësishme mimikën dhe ai nuk e kontrollonte dot aq mirë fytyrën.

Kryeministri Rama është përfolur më parë se mund të ketë bërë botoks, pretendime të cilat Rama i mohoi duke thënë se duket “papritur i qeshur dhe lëkura ime papritur është dukur si lëkura e Fevziut” sepse ka më “pak lodhje dhe stres” dhe “dielli ka filluar të shkëlqejë përsëri mbi Shqipërinë”. Një ekspert i fushës ka treguar në anonimitet për Lapsi.al se “përveç botoksit të injektuar në pjesën e sipërme të ballit, doza jo të vogla materialit filler janë përdorur në pjesën poshtë syve si dhe në atë që ndan sytë me veshët”.

Në një intervistë, Erion Braçe u shpreh se “nuk merret me burra që bëjnë botoks” (duke iu referuar Ervin Salianjit). Sidoqoftë, e vërtetë ose jo, Salianji dukshëm nuk është i pari për të cilin përflitet se ka bërë botoks.

Në një intervistë për “Ftesë në pesë” në Top Channel, kirurgu plastik Panajot Papa tha se “politikanë të njohur kanë kryer botoks tek ai” dhe kanë kërkuar – me të drejtën e pacientit për ruajtje të privatësisë – që të mos u dalë emri.

“Burrat kanë qenë gjithmonë të lidhur me shëndetin dhe mirëqenien në lidhje me atletikën, stërvitjen me pesha dhe ndërtimin e trupit. Këto aktivitete jo vetëm që shfaqin aftësi, por gjithashtu përqendrohen te imazhi i trupit në një farë mase,” shpjegon kirurgu Jaclyn Tomsic për Fortune. “Botoksi dhe procedurat e tjera kozmetike ofrojnë një rrugë tjetër për t’u ndjerë më mirë.” 

Disa faktorë që mund të kontribuojnë në rritjen e popullaritetit të ndërhyrjeve estetike te burrat përfshijnë:

Konkurrenca në vendin e punës: Shumë burra raportojnë se janë të motivuar për të bërë ndërhyrje estetike për të ruajtur konkurrencën ndaj kolegëve më të rinj. Shumë njerëz mendojnë se mbajtja e një pamjeje rinore i ndihmon ata të luftojnë kundër moshës në vendin e punës.

Postimet në rrjete sociale: Postimet në Facebook, Instagram, LinkedIn dhe aplikacionet e takimeve, i bëjnë burrat të duan të kenë një pamje më fresh.

Inkurajimi nga të tjerët: Disa burra mund të jenë të motivuar për të kryer procedura kozmetike nga të tjerët, qofshin këta partnerë, njerëz të afërm ose personazhe të famshëm me ndikim.

Burimi: /Anabel