Mjalti me kanellën janë ndër produktet më të kombinuara të kuzhinës. Mjalti është i fuqishëm kundër inflamacionit dhe alergjive, është shumë i pasur me antioksidantë dhe vlerësohet si antibiotik natyral. Ai përmirëson kujtesën, qelizat e trurit, mbron fytin dhe ndihmon në trajtimin e të djegurave dhe lëndimeve të lëkurës. Mjalti është aleati i sistemit imunitar dhe rrit nivelet e insulinës, gjë që përshpejton çlirimin e serotoninës.

Ky hormon transformohet në melatoninë, e cila ndihmon për një gjumë të qetë. Kanella nga ana tjetër është e pasur me antioksidantë që shmangin sëmundjet dhe pakëson rrezikun e sëmundjeve të zemrës, tensionit të lartë të gjakut. Kanella ndihmon edhe në uljen e nivelit të kolesterolit dhe triglicerideve. Ajo lufton mykun, bakteret dhe shmang infeksionet.

Të dyja përmirësojnë tretjen, luftojnë fryrjet në stomak, plogështinë, dhimbjet e kyçeve, rënien e flokëve, infeksionet e lëkurës, aknet, të ftohurën dhe prishjen e dhëmbëve. Mjalti me kanellën ndihmojnë në uljen e kolesterolit, rënien në peshë, si dhe përmirësojnë shëndetin e zemrës. Kanellën me mjaltin mund t’i kombinoni të dyja dhe të formoni një pastë të ngrënshme e të shijshme.

Në një enë të vogël përzieni një lugë çaji me kanellë, një lugë gjelle me mjaltë dhe nëse dëshironi i shtoni një lugë gjelle me vaj ulliri ekstra të virgjër. Këtë pastë mund ta kombinoni me lëngje të ndryshme frutash dhe perimesh, ta përdorni për të lyer bukën e të tjera, ose mund të konsumoni një lugë në mëngjes ose në mbrëmje. Një tjetër mënyrë është të zgjidhni çajin tuaj të preferuar dhe pasurojeni atë duke shtuar një lugë çaji me kanellë dhe dy lugë çaji me mjaltë. Gjysmën e filxhanit pijeni në mëngjes dhe pjesën e mbetur në mbrëmje.