Në Gjykatën e Posaçme po zhvillohet seanca për masën ndaj të dyshuarve si të përfshirë në Inceneratorin e Tiranës, prej të cilëve janë ekzekutuar 12 masa. Për tre të tjerë vazhdon kërkimi. Gjyqtarja e Posaçme, Irena Gjoka po merr në pyetje 15 të hetuarit për Inceneratorin e Tiranës, mes tyre ish-ministrin e Mjedisit Lefter Koka dhe ish-sekretarin e Përgjithshëm të dikasterit të Mjedisit, Alqi Bllako.

Prej orës 10:30, Gjykata e Posaçme nisi seancën për vlerësimin e masës së sigurisë dhe marrjen në pyetje të 15 personave të vënë nën hetim, për Inceneratorin e Tiranës. SPAK thotë se zyrtarë të lartë të Bashkisë Tiranë dhe ish-zyrtarë të Ministrisë së Mjedisit, paracaktuan fituesit, që ishin dy biznesmenët Mirel Mërtiri e Klodian Zoto.

Dyshohet se ata u përfshinë në korrupsion, shpërdorim detyre e pastrim parash në këtë koncesion. Prokurori Dritan Prençi i kërkoi gjyqtares Irena Gjoka të lërë në fuqi masat, si dhe vijimin e tyre për ata që janë shpallur në mungesë dhe që janë 11 arrest në burg e 4 me arrest në shtëpi.

SPAK thotë se kompjuteri i Klodian Zotos ndihmoi prokurorët në zbërthimin e lidhjeve të tij me zyrtarët që konsultoheshin me të, për procedurat e koncesionit, si dhe dokumentacionin e kërkuar.