Kryeministri hungarez Viktor Orban, ka thënë se “një lloj sëmundjeje” është duke shkatërruar demokracitë perëndimore.

Lideri nacionalist, i cili ka mospajtime të shpeshta me Brukselin, për shkak të çështjeve të lidhura me sundim të ligjit, ka thënë se po sheh “gjëra të çuditshme në botën demokratike”.

Gjatë adresimit të tij vjetor, ai ka thënë se “demokracitë po shkatërrohen nga një sëmundje”, por nuk ka përmendur ndonjë emër në mënyrë specifike.

“Na duhet të jemi të vëmendshëm, sepse është një demokraci e madhe që, nëse e kam kuptuar drejt, dëshiron të bllokojë një prej kandidatëve më të pëlqyer për president, duke e ngarkuar me çështje ligjore, për t’ia parandaluar garën”, ka thënë ai.

Të martën, Gjykata Supreme në Kolorado ka marrë vendim që ish-presidenti amerikan, Donald Trump nuk është i përshtatshëm për të garuar për president në këtë shtet, për shkak të përfshirjes në sulmet kundër Kongresit amerikan në janar të vitit 2021.

Kjo besohet se ka qenë referencë për Gjermaninë, ku shërbimet e inteligjencës kanë nisur të vëzhgojnë partinë e të djathtës ekstreme, Alternativa për Gjermaninë, më 2021, për tendencat ekstremiste.

“Dhe e shoh një shtet të tretë ku kontrolli mbi televizionin është bërë nga forca policore”, ka thënë Orban.

Së fundi, në Poloni është ndryshuar qeveria, dhe partia e krahut të djathtë, Ligji dhe Drejtësia – e afërt me partinë e Orbanit, Fidesz – është zëvendësuar nga krahut pro evropian i udhëhequr prej Donald Tuskut.

Prej kur është ngjitur në pushtet, më 2010, Orbani është kritikuar rregullisht nga Brukseli, dhe organizatat ndërkombëtare, për çështje të sundimit të ligjit, migrimit dhe të ngjashme.

Më 2022, Parlamenti Evropian ka thënë se ky shtet në Evropën Qendrore nuk është më “demokraci” mirëpo “regjim hibrid i autokracisë zgjedhore”, dhe kjo përbën shkelje serioze të normave demokratike të BE-së.