Presidentja Vjosa Osmani tha se ngurrimi për të pranuar Kosovën në NATO e në Bashkim Europian (BE), lë të hapur mundësinë për destabilizimin “jo vetëm të Kosovës, por të rajonit e më gjerë”. Në një konferencë për media me presidentin e Bullgarisë, Rumen Radev në Prishtinë, Osmani u shpreh se Kosova bazohet në mbështetjen bullgare për anëtarësimin në bllok.

Udhëheqja e guximshme dhe veprimet vendimtare të aleatëve tanë në familjen euroatlantike për ta përshpejtuar pranimin e bazuar në merita të vendeve demokratike të rajonit në BE dhe NATO, sepse çdo hezitim do të krijonte një boshllëk që aktorët keqdashës ta destabilizojnë jo vetëm Kosovën, por edhe rajonin e përtej.

Kosova aplikoi për anëtarësim në BE vitin e kaluar, por u kritikua nga Komisioni Europian në raportin vjetor të nëntorit për “përparim të kufizuar” e për moszbatimin e marrëveshjeve të arritura në dialogun me Serbinë.

Presidenti bullgar tha se Bullgaria mbështet Kosovën e gjithë rajonin e Ballkanit Perëndimor për anëtarësim në bllok, por kërkon që Kosova dhe Serbia të bien dakord për normalizimin e marrëdhënieve.

Sofja do të vazhdojë ta mbështesë Kosovën për anëtarësim në Këshillin e Europës. Bullgaria është një prej motorëve për integrimin e të gjitha vendeve të Ballkanit Perëndimor në BE. Ne nuk mund ta lëmë Kosovën në plan të dytë, aq më tepër në fushën e sigurisë.

Radev shtoi se arritja e marrëveshjes për normalizimin e marrëdhënieve mes Beogradit dhe Prishtinës “është me rëndësi për sigurinë, stabilitetin dhe mirëqenien e rajonit tonë”.

Gjendja në veriun e Kosovës me shumicë serbe vazhdon e tensionuar prej fillimit të vitit kur serbët atje kundërshtuan kryetarët shqiptarë në katër komuna. Ata u zgjodhën nga votimet e bojkotuara nga serbët në muajin prill.

Më 24 shtator, gjendja u përshkallëzua pasi Policia e Kosovës u sulmua nga një grup i armatosur serbësh në fshatin Banjskë të Zveçanit, ku mbeti i vrarë polici Afrim Bunjaku. Gjatë përleshjeve që pasuan u vranë edhe tre sulmues serbë.

Kosova ka fajësuar Serbinë për sulmin, por Beogradi ka mohuar përfshirjen. Radev shtoi se Bullgaria vazhdon të ngulë këmbë për dialogun si mënyrën e vetme për zgjidhjen e problemeve dhe paralelisht zbatimin e të gjitha marrëveshjeve mes Kosovës e Serbisë.

Mendojmë se kjo është rruga e vetme. Ne përjashtojmë provokimet e armatosura dhe dhunën. Ne ngulim këmbë që BE-ja ta ketë një rol aktiv për dialogun intensiv e gjetjen e zgjidhjeve.