Përmbytjet e shkaktuara nga reshjet intensive kanë prekur dhjetëra mijëra njerëz në pjesën jugore të Tajlandës, thanë zyrtarët më 25 dhjetor. Vërshimet bënë që disa rrugë dhe linja hekurudhore të mbylleshin.

Të paktën 12 shkolla në provincat Yala dhe Narathiëat janë detyruar të mbyllen, ndërsa pamjet e agjencisë së lajmeve AFP në këtë rajon tregonin shtëpi dhe dyqane të përmbytura dhe banorët që strehoheshin në katet e sipërme.

Shirat e dendur kanë shkaktuar gjithashtu probleme në det, me të paktën shtatë varka të fundosura në Gjirin e Tajlandës dhe Detin Andaman që nga 22 dhjetori.

Autoritetet kanë paralajmëruar njerëzit në provincat jugore që të jenë gati të evakuohen nëse situata e përmbytjeve përkeqësohet. Aktualisht, zyrtarët provincialë po punojnë me autoritetet lokale për të kërkuar zgjidhje kullimi në zonat e përmbytura dhe për të vlerësuar shkallën e dëmit.

Departamenti i Meteorologjisë Tajlandeze parashikoi më parë se musoni verilindor do të prekte Gjirin e Tajlandës dhe rajonin jugor me erëra të forta. Më 24-25 dhjetor, një sistem me presion të ulët u forcua përgjatë bregut të Malajzisë, lëvizi nëpër rajonin jugor të Tajlandës dhe zbarkoi në detin Andaman, duke shkaktuar shira të dendur dhe shumë të dendur në disa zona në rajonin jugor të rrjedhës së poshtme.

Departamenti ka këshilluar njerëzit në ato zona që të marrin masa paraprake kundër përmbytjeve të papritura dhe rrëshqitjeve të dheut, veçanërisht në zonat malore pranë rrugëve ujore dhe zonave të ulëta. Në Gjirin e Tajlandës parashikohen dallgë me lartësi 2 deri në 4 metra. Anijet që operojnë në Gjirin e Tajlandës dhe Detin Andaman, veçanërisht në zonat me stuhi, këshillohen të tregojnë kujdes, ndërsa anijet e vogla në Gjirin e Tajlandës u kërkohet të mos shkojnë në det gjatë kësaj periudhe.

Tajlanda goditet shpesh nga përmbytje, të cilat ndodhin në periudha të ndryshme kohore. Në pjesën jugore, sezoni i të reshurave më të dendura fillon në tetor dhe përfundon në mars.

Në vitin 2017, ky rajon ishte goditur nga përmbytjet më të mëdha në 30 vjetët e fundit, që kishin shkaktuar dëme të mëdha dhe kishin lënë 95 njerëz të vdekur.