Këngëtarja e njohur irlandeze Sinead O’Connor, e cila u gjet e vdekur në shtëpinë e saj në Londër në korrik të vitit të kaluar, vdiq nga shkaqe natyrore, ka thënë mjeku ligjor. Këngëtarja e famshme e këngës “Nothing Compares 2 U” u shpall e vdekur në vendin e ngjarjes dhe policia tha se vdekja e saj nuk po trajtohet si e dyshimtë. Gjykata e mjekëve ligjor kishte thënë në kohën e vdekjes se do të kryhej një autopsi përpara se të merrej një vendim nëse do të mbahet një hetim.

Vdekja e O’Connor shkaktoi një valë pikëllimi nga fansat e saj, përfshirë muzikantë dhe yje të tjera të showbizit, veçanërisht në atdheun e saj, Irlandë. Muzikantja, e cila u bë e famshme në vitet ’90, ndryshoi imazhin e grave në muzikë në atë kohë.

Ajo ishte gjithashtu e zëshme në qëndrimin e saj politik kundër Kishës Katolike. Agjentët e së ndjerës zbuluan se ajo kishte qenë duke përfunduar një album të ri dhe po planifikonte një turne si dhe një film bazuar në autobiografinë e saj, “Rememberings”, para se të vdiste.

Ajo u konvertua në Islam në vitin 2018 dhe mori emrin Shuhada’ Davitt, më vonë Shuhada’ Sadaqat, por vazhdoi të përdorë Sinead O’Connor në jetën e saj profesionale. Muzikantja gjithashtu kishte folur publikisht për shëndetin e saj mendor, duke i thënë prezantueses televizive amerikane Oprah Winfrey në vitin 2007 se ajo përballej me mendime për vetëvrasje dhe ishte diagnostikuar me çrregullim bipolar. Së fundmi, ajo u largua nga vëmendja publike pas vdekjes së djalit të saj Shane, i cili u vetëvra në vitin 2022, në moshën 17-vjeçare.