Hera e fundit që Samsung nuk ka qenë në vendin e parë të shitjeve të smartphone në një vit të caktuar është viti 2010.

E megjithatë, në fund, ndodhi sërish. Ashtu si shoqëria konkurrente e analizave Canalys zbuloi pak orë më parë, edhe IDC publikoi raportin e saj, duke konfirmuar lajmin që përsëritet pas më shumë se një dekade: Apple i zë vendin e parë Samsung në vitin 2023.

Ndryshimi në renditje vjen pas një viti të vështirë, ku konsumatorët kanë frenuar blerjet e smartphone-ve për shkak të paqartësive makroekonomike dhe inflacionit të lartë.

Edhe rimëkëmbja më e ngadaltë se parashikimi e Kinës, tregu më i madh i smartphone-ve në botë ndikoi gjithashtu te shitjet e përgjithshme të telefonave.

Sipas vlerësimeve të IDC, kompania me seli në Cupertino dërgoi 234,6 milionë smartphone vitin e kaluar, duke zënë 20.1% pjesë tregu, ndërsa Samsung dërgoi vetëm 226,6 milionë smartphone, duke zënë 19.4% të tregut.

Në vendin e tretë renditet Xiaomi me 145,9 milionë njësi të dërguara dhe pjesë tregu prej 12.5%, ndjekur nga Oppo me 103,1 milionë njësi të dërguara dhe 8,8% të tregut dhe Transsion, me 94,9 milionë njësi të dërguara duke zënë 8,1% të tregut.

Krahasuar me vitin 2022, dërgesat e Apple u rritën me 3.7% ndërsa ato të Transsion me 30.8%. Nëse po pyesni veten, Transsion është shoqëria që zotëron Tecno dhe Infinix.

Në anën tjetër, dërgesat e Samsung u tkurrën me 13.6% krahasuar me një vit më parë, ato të Xiaomi me 4.7% kurse të Oppo me 9.9%.

Nëse shikojmë tregun në total, dërgesat ranë me 3.2% në vitin 2023 krahasuar me 2022.

Në tremujorin e katërt 2023 (nga tetori në dhjetor), Apple zuri vendin e parë me 80,5 milionë dërgesa dhe pjesë tregu prej 24,7%; Samsung shiti 53 milionë njësi duke zënë 16,3% të tregut dhe Xiaomi shiti 40,7 milionë njësi duke zënë 12,5% të tregut (për rastësi është e njëjta përqindje për të gjithë vitin)

Transsion renditej i katërti me 28,2 milionë smartphone të dërguar dhe 8.6% pjesë tregu, ndërsa në vendin e pestë ishte vivo, me 24,1 milionë njësi të dërguara dhe 7.5% pjesë tregu.

Në total, në tremujorin e katërt 2023, tregu është rritur me 8.5% krahasuar me tremujorin e katërt 2022.

Burimi: /Reuters & GSM Arena