Sulm i armatosur në një kishë italiane në Stamboll, një viktimë. Sipas ministrit të Brendshëm turk, Ali Yerlikaya, ngjarja ndodhi rreth orës 11:40, me atë lokale, në qarkun Sarijer. Gjatë një ceremonie fetare, kisha u sulmua nga dy persona të maskuar. Turqia nisi hetime.

Ministri theksoi se autoritetet e identifikuan viktimën me inicialet C.T, duke thënë se ai po merrte pjesë në shërbesën e sotme kur u sulmua objekti i kultit.

Ne e dënojmë fuqishëm këtë sulm të ulët!

Omer Celik, zëdhënës i partisë në pushtet, AKP, tha se sulmuesit kishin në shënjestër një person që gjendej në kishë.

Forcat tona të sigurisë po kryejnë një hetim të gjerë të kësaj ngjarjeje. Ata që kërcënojnë paqen dhe sigurinë e qytetarëve tanë, kurrë nuk do të arrijnë të përmbushin qëllimet e tyre!

Mediat turke kanë raportuar se nga sulmi ka edhe persona të tjerë të plagosur, por këto pretendime nuk janë konfirmuar ende nga autoritetet. Ndërkaq, motivi i sulmit akoma nuk është i qartë.

Në dhjetorin e vitit të kaluar, forcat turke të sigurisë arrestuan 32 persona, të dyshuar se kishin lidhje me xhihadistët e grupit militant, Shteti Islamik. Në atë kohë, autoritetet thanë se të arrestuarit dyshoheshin se po planifikonin të sulmonin kisha dhe sinagoga, por edhe selinë e ambasadës irakiane.

Ekstremistët e ISIS-it kanë kryer një sërë atentatesh në tokën turke, përfshirë një sulm në vitin 2017 në një klub nate në Stamboll, duke vrarë 39 persona.