Protestuesit të cilët morën pjesë në tubimin e thirrur nga opozita i janë drejtuar banesës së ish-kryeministrit Sali Berisha.

Ajo që vlen për t’u theksuar është edhe prezenca e Gazment Bardhit, i cili u është bashkuar simpatizantëve të Berishës në drejtim të rrugës “Mustafa Matohiti”.

Mësohet se kanë qenë simpatizantët ata që kanë kërkuar që Bardhi t’u bashkohet duke lëshuar thirrje.

Dy incidente kanë shoqëruar seancën e sotme plenare, e mbajtur mes kaosit opozitar për të diskutuar mbi problemet e zgjedhësve.

Ndërsa deputetët e përjashtuar demokratë vazhdonin përplasjen me Gardën e Republikës te dera e Kuvendit, Gazment Bardhi, Asllan Dogjani dhe Flamur Noka kanë çarë kordonin dhe kanë arritur të afrohen tek foltorja ku po mbanin fjalën deputetët e maxhorancës.

Me të hyrë në sallë Bardhi i është drejtuar foltores dhe ulëseve të qeverisë, duke hedhur tutje xhaketën dhe bërtitur në drejtim të kryeministrit Rama “kush je ti?!”. Menjëherë kanë ndërhyrë gardistët, të cilët u bënë gardh tek foltorja për të mos t’i lejuar ata të kalonin.

Përballë një situatë të tillë, pasi i akuzuan disa herë socialistët për provokim, Asllan Dogjani ka rrëmbyer librin e rregullores dhe ka qëlluar me të në ajër në drejtim të kryeministrit Rama.