Leopardi indian i borës klasifikohet nga Bashkimi Ndërkombëtar për Ruajtjen e Natyrës si një specie e cënueshme. Kjo specie prej vitesh përballet me kërcënime të ndryshme për mbijetesë sepse po humbet habitatin e saj për shkak të zgjerimit të vendbanimeve, por është edhe një objektiv për gjuetinë pa leje. Anketa e Programit të Vlerësimit të Popullsisë së Leopardit të Borës në Indi (SPAI) u krye nga viti 2019 deri në vitin 2023 dhe në Indi mbuloi afërsisht 120,000 kilometra katrorë të habitatit të tij në të gjithë rajonin Trans-Himalayan.

“Deri më tani, shpërndarja e leopardit të borës në Indi nuk mund të përcaktohet për shkak të mungesës së anketimeve të gjera të kësaj specie që do të mbulojë të gjithë vendin”,-tha Ministria e Mjedisit në një deklaratë. Kamerat e aktivizuara me lëvizje të instaluara në të gjithë vendin identifikuan 214 leopardë individualë të borës dhe anketuesit analizuan gjurmët e tyre dhe të dhëna të tjera për të vlerësuar popullsinë totale në 718.

Popullata e leopardit të borës tregon shëndetin e ekosistemit. Hulumtimi mund të ndihmojë në identifikimin e kërcënimeve të mundshme për habitatin e leopardit dhe ndikimin e ndryshimeve klimatike. “Integriteti i këtyre habitateve në lartësi të mëdha është i ndërthurur me strukturën socio-kulturore të komuniteteve lokale dhe mirëmbajtjen ekonomike të popullsisë që jeton në rrëzë të këtyre zonave”,-thuhet në raport. Gjithashtu shtohet se rreth 70% e habitatit të leopardit është i pambrojtur dhe se, për të siguruar mbijetesën afatgjatë të tyre, është i nevojshëm monitorimi i vazhdueshëm i saj.