Deputeti i vetëm shqiptar në parlamentin e Serbisë, Shaip Kamberi është takuar mëngjesin e sotëm me kryeministrin serb, Vuçiç.

Kamberi i ka prezantuar kryeministrit të Serbisë disa kërkesa për shqiptarët, ndërsa i ka bërë me dije se nuk janë të interesuar për asnjë pozitë në nivel qendror.

Sipas Kamberit, në këtë takim i kanë kërkuar Vuçiçit që Serbia të ndryshojë qasje ndaj shqiptarëve të Luginës së Preshevës dhe të zbatohet “Plani 7-pikësh”.

Postimi i plotë:

Bashkë me Nevzadin, kryetarin e Këshillit kombëtar shqiptar dhe Rahimin, personin e autorizuar të Listës zgjedhore

“Beteja politike e shqiptarëve vazhdon – Shaip Kamberi”, në kuadër të konsultimeve për themelimin e qeverisë, takuam presidentin e Serbisë, Aleksandar Vuçiç.

Presidentit Vuçiç i prezantuam kërkesat legjitime të shqiptarëve të Luginës të bazuara në Planin 7 pikësh, ripërsëritëm qëndrimin tonë të përbashkët se nuk jemi të interesuar për asnjë pozitë në nivel qendror por që konsiderojmë se avancimi i të drejtave të shqiptarëve është interesi jonë i vetëm dhe ai duhet të fillojë nga institucionet shtetërore të nivelit lokal e rajonal.

Qasja e shtetit ndaj shqiptarëve duhet të ndryshojë.

Rasti i mjekëve të diskriminuar të Preshevës kërkon zgjidhje urgjente, njëjtë sikur integrimi i shqiptarëve të kualifikuar në polici.

Me presidentin Vuçiç diskutuam edhe për nevojën e privatizimit të Banjës së Bujanocit, rritjes së investimeve në nivel lokal dhe ndaljen e gjuhës së urrejtjes ndaj shqiptarëve.

Shkollat në gjuhën shqipe dhe përmirësimi i infrastrukturës në to do të duhej të jenë agjendë e qeverisë së re, ndërsa riemërimi i shkollës në Bilaç “Ismail Kadare” do duhej të siguronte qasje konstruktive të ministrisë.

Diplomat kërkojnë zgjidhje urgjente. Nga to varet edhe avancimi i pozitës së shqiptarëve të Luginës dhe sigurimi i një perspektive më të mirë për të gjithë.

Institucionet shtetërore në nivel lokal duhet të hapin dyert për integrimin e shqiptarëve. Mbyllja e tyre nënkupton përjashtim të popullsisë shumicë në Luginë të Preshevës.

Beteja jonë në realizim e kërkesave tona vazhdon.