Agjërimi gjatë muajit të Ramazanit mund të sjellë shumë përfitime në aspektin e shëndetit fizik dhe mendor. Duke respektuar agjërimin gjatë ditës, trupi merr pushim nga tretja e vazhdueshme, gjë që mund të ndihmojë në përmirësimin e funksionit metabolik dhe promovimin e shëndetit dhe mirëqenies së përgjithshme.

Një studim amerikan thotë se ciklet e agjërimit të zgjatur jo vetëm që mbrojnë nga dëmtimi i sistemit imunitar një efekt anësor kryesor i kimioterapisë por gjithashtu nxisin rigjenerimin e sistemit imunitar, duke i zhvendosur qelizat burimore nga një gjendje e fjetur në një gjendje të vetë-rinovimit.

Ndërkaq, mungesa e ujit e bën aktivitetin fizik shumë të vështirë gjatë muajit të Ramazanit dhe për shkak të etjes niveli i energjisë mund të jetë dukshëm më i ulët. Prandaj, shumë trajnerë të fitnesit rekomandojnë që të bëni ushtrimet pas iftarit në mënyrë që të keni energji të mjaftueshme për t’ju ndihmuar të arrini rezultate maksimale. Gjithashtu, rekomandohet konsumimi i një sasie më të vogël të ushqimit pas iftarit, e më pas konsumimi i një vakti më të madh pas stërvitjes.

Duke qenë se ne nuk kemi gjithmonë orare fleksibël, stërvitja në mes të ditës ose vonë në mbrëmje para syfyrit është e pranueshme për sa kohë që ne ende i kushtojmë vëmendje nevojave të trupit tonë. Përsa i përket zgjedhjes së ushtrimeve, rekomandohet që të zgjidhni ato që nuk do t’ju lodhin shumë dhe do t’ju lënë me dhimbje të muskujve. Gjatë këtij muaji fokusi duhet të jetë ruajtja e fitnesit, jo përmirësimi i performancës apo rritja e intensitetit.

Ushtrimet e forcës janë një mënyrë adekuate për të ruajtur gjendjen fizike. Moderimi është çelësi i stërvitjes së sigurt gjatë agjërimit. Menjëherë para ose pas stërvitjes intensive, është veçanërisht e rëndësishme të jeni të hidratuar mirë dhe të ushqyer në mënyrë adekuate, gjë që do t’ju japë energji të mjaftueshme.

Duke folur për zgjedhjen e ushqimit, rekomandohet të hani ushqime të pasura me proteina dhe karbohidrate. Proteinat ndihmojnë në rikuperimin e muskujve sikurse janë mishi, bulmeti dhe smoothie-t. Përveç kësaj, karbohidratet janë forma të energjisë me çlirim të ngadaltë, që do të thotë se ato ndihmojnë në qëndrueshmërinë dhe ruajtjen e niveleve të energjisë gjatë gjithë ditës.