Të gjithë e dimë se përqafimet mund të jenë ngushëlluese në kohë të vështira. Përqafimi vepron gjithashtu si një stimulues i intimitetit, veçanërisht nëse përqafoheni për një kohë të gjatë. Sipas “Psychology Today”, përqafimi për 20 sekonda mund të jetë jashtëzakonisht i dobishëm për marrëdhënien tuaj. Ndërkaq, prekja mund të sjellë përfitime të rëndësishme për shëndetin tuaj mendor dhe fizik, sipas një studimi të ri. Prekja është shqisa e parë që zhvillohet në trupin tonë, pasi është thelbësore për t’u përshtatur me ndryshimet në mjedis, por edhe për të komunikuar me të tjerët.

Një studim i ri i botuar në revistën “Nature Human Behavior” mblodhi 212 studime të botuara dhe analizoi 85 studime që përfshinin të rriturit dhe 52 që fokusoheshin tek të porsalindurit. Sipas Guardian, rezultatet treguan se prekja ishte po aq e dobishme për shëndetin mendor dhe fizik, me një ndikim më të madh në pjesë të caktuara të trupit. Dr.Elena Hartmann, një nga autoret e studimit nga Spitali Universitar Essen, tha:

Më shumë kontakte konsensuale përmes prekjes gjatë ditës sonë mund të ndihmojnë në zbutjen e problemeve mendore dhe fizike.

Ndërkohë, studiuesit e tjerë raportuan se prekjet janë më të përshtatshme për reduktimin e dhimbjes, depresionit dhe ankthit tek të rriturit dhe fëmijët, si dhe shtimi në peshë tek të sapolindurit.

Ndër rezultatet e tjera, studiuesit arritën në përfundimin se prekja ishte e dobishme si për njerëzit e shëndetshëm ashtu edhe për ata jo të shëndetshëm, megjithëse ndikimi ishte më i madh tek këta të fundit për sa i përket përfitimeve të shëndetit mendor. Ndërkaq, prekja e kokës shoqërohej me përfitime më të mëdha shëndetësore sesa prekja e pjesëve të tjera të trupit.