Presidentja Vjosa Osmani tha se pesë policë të Kosovës “po mbahen peng” nga Serbia, shtet të cilin e cilësoi “shovinist”. Osmani i bëri thirrje faktorit ndërkombëtar të reagojë për këtë çështje.

U bëjmë thirrje të gjithë aleatëve tanë që ta ngrenë zërin dhe t’i rrisin përpjekjet që të ndalin mizoritë dhe veprimet e tilla shoviniste kundër qytetarëve tanë dhe kundër policisë sonë. Por, jam e bindur që betimi i sotëm, dhe të gjithë këta kadetë dhe ky grup multietnik është përgjigjja më e fuqishme kundër përpjekjeve të tilla.

Përderisa vazhdimisht përballemi me sfida të sigurisë, mos të harrojmë edhe në këto momente pesë policë të Republikës sonë po mbahen peng nga një shtet shovinist, nga Serbia. Kërcënimet dhe rreziqet janë përditshmëri e jona ndaj është domosdoshmëri që Republika e Kosovës me institucionet e saj të jetë anëtare fuqiplotë e INTERPOL-it dhe e EUROPOL-it.

Ministria e Punëve të Brendshme e Kosovës (MPB) njoftoi se një zv.drejtor i Policisë së Kosovës dhe katër zyrtarë policorë po mbahen nga autoritetet serbe. Zv.drejtori i Policisë së Kosovës i kombësisë serbe, Dejan Jankoviç është duke u mbajtur në ndalim nga mëngjesi i sotëm (e mërkurë 17 prill) pa asnjë sqarim.

Jankoviç, nga komuna e Shtërpcës u ndalua në pikën kufitare me Serbinë, Jarinjë, në veri të Kosovës dhe u dërgua për t’u marrë në pyetje në qytetin jugperëndimor të Serbisë, Rashkë. MPB-ja tha se fillimisht u ndaluan dhjetë zyrtarë policorë shqiptarë dhe serbë, por pesë prej tyre u liruan.

Ndërkaq, ministri i Punëve të Brendshme i Kosovës, Xhelal Sveçla, përsëriti se ende nuk ka ndonjë arsyetim nga Serbia se pse pesë zyrtarët policorë po mbahen në Rashkë.

Ky është një sulm i drejtpërdrejtë i Serbisë ndaj pjesëtarëve të vet komunitetit serb brenda Policisë së Kosovës, të cilët gjejnë vullnetin dhe guximin të bashkohen në rrugën e përbashkët që synon shërbim e siguri për të gjithë qytetarët dhe stabilitet për vendin tonë.

Udhëtarë dhe autobusë nga Kosova, dje u bllokuan në kufijtë e Serbisë me Hungarinë e Kroacinë. Prishtina tha se ndalimi i tyre u bë në shenjë hakmarrjeje nga Serbia për shkak të votës pro mbështetjes së anëtarësimit të Kosovës në Këshillin e Europës.

Serbia mohoi se ka ndaluar autobusët me udhëtarë nga Kosova, duke i cilësuar akuzat “të pabaza”.

Po forcohet kontrolli i të gjithë pasagjerëve në pikat kufitare dhe po kryhen kontrolle të sigurisë, e gjitha kjo me qëllim të sigurisë dhe sigurisë më të madhe të qytetarëve, gjë që mund të shkaktojë një qëndrim më të gjatë në vetë pikën kufitare.

Edhe në të kaluarën, qytetarët të Kosovës që kalojnë përmes Serbisë kanë hasur në probleme, me disa prej tyre që janë arrestuar nga autoritetet serbe nën dyshimet për krime lufte.