Tetë anëtarë republikanë të Kongresit i kanë kërkuar Sekretarit Amerikan të Mbrojtjes Lloyd Austin të japë shpjegime lidhur me mospërputhjet midis raportimit të CNN muajin e kaluar në lidhje me sulmin e ISIS, që çoi në vdekjen e 13 ushtarakëve amerikanë dhe 170 afganëve jashtë aeroportit të Kabulit në 2021, dhe përfundimet e dy hetimeve të Pentagonit për incidentin.

Raporti i CNN zbuloi se kishte shumë më tepër episode të shtënash me armë zjarri sesa Pentagoni ka pranuar, në vazhdën e sulmit vetëvrasës në ditët e fundit të evakuimit amerikan të Kabulit.

Raportimi përfshinte një video të CNN e kapur nga kamera GoPro e një marine, e cila nuk ishte parë plotësisht publikisht më parë.

Kjo kërkesë u bë përmes një letre të dërguar të martën nga kongresmenët në Komitetin e Punëve të Jashtme të Dhomës së Përfaqësuesve, ku u paraqitën dhe një sërë pyetjesh të theksuara për Pentagonin në lidhje me hetimet e tij mbi atë që ishte incidenti më vdekjeprurës në Afganistan për dekada.

Aeroporti i Kabulit ishte kthyer në një skenë kaosi kur talebanët morën kontrollin e qytetit afgan nga 15 gushti 2021.

Presidenti Biden kishte urdhëruar komandantët amerikanë të mbrojnë trupat amerikane që ndodhen në aeroportin e Kabulit, të cilat po punonin për të përmbyllur fazat e fundit të tërheqjes.