Për të gjithë nxënësit që presin të dinë se kur do të nisin provimet e maturës, më poshtë ju tregojmë datat, të cilat janë publikuar nga Ogerta Manastirliu, ministre e Arsimit.

Gjuhë e huaj – 03 qershor 2024
Gjuhë shqipe dhe letërsi – 10 qershor 2024
Matematikë – 18 qershor 2024
Teori Profesionale e Integruar për Maturën Shtetërore Profesionale – 24 qershor 2024

Siç edhe mund ta dini, provimet e maturës së shtetit nisin në orën 10:00 të paraditës dhe zgjasin 2 orë e 30 minuta.

Ndërkohë, për t’ju ardhur në ndihmë, ju rikujtojmë edhe një teknikë, e cila mund të përdoret për të nxënë në mënyrë më efektive.

Teknika “pomodoro” është një metodë e suksesshme që ka të bëjë me rritjen e nivelit të produktivitetit, për të përmbushur një detyrë të caktuar, në këtë rast, për të mësuar për provimet. Fillimisht, u zhvillua nga Francesco Cirillo në fund të viteve ’80 dhe më pas, u aplikua edhe në shkollat e biznesit në Romë. Emri e ka origjinën nga “pomodoro” (në italisht “domate”), pasi ora e parë që përdori Cirillo ndodhej në kuzhinë dhe kishte formën e një domateje.

Kjo teori konsiston me vendosjen e orareve fikse për mësimin, por edhe për të marrë pushime midis, të cilat nxisin kreativitetin dhe ju bëjnë më produktivë.

Si ta aplikoni?

Zgjidhni një kapitull që doni të mësoni.

Vendosni alarmin për 25 minuta.

Mësoni kapitullin derisa të bjerë alarmi.

Merrni një pushim të shkurtër, 5-10 minuta.

Punoni sërish për 25 minuta.

Pas 3-4 përsëritjesh, merrni një pushim më të gjatë, rreth 20-30 minuta.