Respekti shprehet me veprime dhe fjalë, të tuat dhe të atyre që janë përreth jush. Si mund ta fitosh respektin që meriton? “Respekti ndaj vetvetes” përkthehet si “respekt i duhur ndaj vetes si qenie njerëzore”. Ka të bëjë me kujdesin ndaj vetes dhe në të përfshihet dëgjimi i ndjenjave të tua, zbulimi se në çfarë beson dhe zgjedhja e asaj që për ty është e drejtë. Të respektosh veten bëhet më e plotë po të shtosh edhe vlerat e vetes, pranimin i vetes dhe besimin në vetvete.

Çdokush dëgjon brenda vetes një zë që i thotë se çfarë mendon dhe ndien në të vërtetë, ndonjëherë është thjesht një pëshpëritje, por që ju përcjell sinjalet e trupit apo të shpirtit. Nëse përqendrohesh te këto sinjale, do ta kesh më të lehtë të kuptosh nevojat e tua të përditshme apo nga se trembesh. Të dëgjosh zemrën tënde, është një formë vetëmbrojtjeje.

Kufiri është një vijë e padukshme, të cilën nuk do të donit t’jua shkelnin të tjerët. Kufijtë e tu përcaktohen nga vlerat e tua, caqet e tu personalë dhe përvoja e jetës. Vendosja e kufijve ka të bëjë me mënyrën sesi ju flet ndokush apo se si sillet me ju, etj. Kufijtë nuk janë mure që të ndajnë nga njerëzit, çdokush mund të hyjë lehtësisht brenda tyre. Por, kur vendos kufij dhe i respekton ata, marrëdhëniet e tua bëhen të respektueshme.

Kur ti flet dhe të tjerët të dëgjojnë me vëmendje, atëherë ndihesh e vlefshme. Ndodh të kesh frikë të shprehesh, i/e frikësuar se mos të gjykojnë, apo ngaqë ajo që do të thuash të duket e pakuptimtë. Të shprehësh mendimin tënd, do të thotë të thuash atë që mendon. Vetëm kështu të tjerët kuptojnë qartë se çfarë gjëra të pëlqejnë dhe çfarë nuk të pëlqejnë. Në këtë mënyrë, ata mësojnë edhe se si të sillen me ty.

Në thelb të respektit është besimi se të gjitha qeniet njerëzore, pavarësisht nga formimi kulturor apo mënyra sesi jetojnë, e meritojnë të respektohen njëlloj. Për këtë qëllim, shpeshherë flisni për të drejtat tuaja, bëni që të tjerët të veprojnë ngjashëm. Sa herë që të përballeni me ndonjë lloj diskriminimi, duhet të besoni se edhe ju jeni të barabartë me të tjerët.