Me hapjen e sezonit turistik këtë vit ku pritet fluks i madh pushuesish e ku  për pasojë rriten edhe rastet e urgjencave mjekësore, përveç autoambulancave për herë të parë në Shqipëri ofrohet shërbim edhe me motorë mjekësorë.

“Orët e pikut kur ka shumë ngarkesë e nuk kalojnë dot autoambulancat, e kishin të nevojshëm motorin mjekësor”, tha Skënder Brataj,  shef i Urgjencës Kombëtare.

Kanë mbërritur 4 motorët e parë por, do të nevojiteshin 20 thotë Brataj në mënyrë që çdo qytet të kishte një të tillë.

“Janë të pajisur edhe me defibrilatorë”, tha Brataj.

Tanimë  mjeku apo infermieri që do të niset për të ofruar shërbim shëndetësor me motor duhet të dijë të drejtojë këtë mjet.

Ministrja e Shëndetësisë dhe Mbrojtjes Sociale, Albana Koçiu deklaroi nga Vlora, ku pati një demonstrim të motoambulancave, se për herë të parë gjatë këtij sezoni veror, flotës së urgjencës mjekësore paraspitalore i janë shtuar edhe motoambulancat dhe është rritur numri i autoambulancave për 34 qendrat shëndetësore verore.

Koçiu deklaroi se këto motoambulance, risi e masave të marra “janë zgjidhja e duhur në ato situata kur e kemi të pamundur që të aksesojmë shpejt një ngjarje apo dikë që ka nevojë për ndërhyrje shëndetësore sa më të shpejtë”. “Me motoambulancat do të kemi një reagim shumë të shpejtë dhe e sjellim mjekun, infermierin në kontakt të drejtpërdrejtë me pacientin”, theksoi ministrja.