Kancelari gjerman, Olaf Scholz paralajmëroi indirekt presidenten e Komisionit Europian, Ursula von der Leyen të mos përpiqet të sigurojë një mandat tjetër në detyrë pas zgjedhjeve europiane me ndihmën e ekstremistëve të krahut të djathtë.

Eshtë e qartë për mua se kur të formohet Komisioni i ardhshëm Europian, nuk duhet të bazohet në një shumicë në parlament që kërkon gjithashtu mbështetjen e ekstremistëve të krahut të djathtë, tha Scholz në një konferencë të përbashkët për shtyp me kryeministrin portugez Luís Montenegro në Berlin. Në këtë drejtim, jam shumë i trishtuar nga paqartësia e disa deklaratave politike.

Në muajin prill, Von der Leyen nuk e përjashtoi bashkëpunimin me grupin e djathtë të Konservatorëve dhe Reformistëve Europianë (ECR), të cilit i përket edhe partia e kryeministres italiane Giorgia Meloni, “Fratelli d’Italia”.

Von der Leyen, kandidatja kryesore e grupit konservator të Partisë Popullore Europiane (EPP), mbrojti pozicionin e saj në Parlamentin Europian.

Kam punuar shumë mirë me Giorgia Melonin në Këshillin Europian, ashtu siç bëj me të gjithë drejtuesit e shteteve dhe kryeministrat, tha politikania gjermane e kristiandemokratëve (CDU).

Scholz, një socialdemokrat i qendrës së majtë u shpreh se pozicioni i tij ishte i qartë:

Do të jetë i mundur vetëm krijimi i një presidence të komisionit që bazohet në partitë tradicionale… Çdo gjë tjetër do të ishte një gabim për të ardhmen e Europës.

Nga ana e saj, Von der Leyen kritikoi ashpër partinë e ekstremit të djathtë, Alternativa për Gjermaninë (AfD) në një fjalim në shtetin verior gjerman të Saksonisë së Ulët.

AfD është në luftë me vlerat themelore, po nxit propagandën për presidentin rus Vladimir Putin në shoqërinë gjermane e po kryen spiunazh në favor të Kinës, u shpreh dje në një aktivitet të fushatës zgjedhore europiane për partinë e saj CDU në Steinhude.

Kreu i grupit “Identitet dhe Demokraci” në Parlamentin Europian, dy ditë më parë bëri një kërkesë për të përjashtuar partinë e ekstremit të djathtë Alternativa për Gjermaninë (AfD).

Vendimi erdhi pas një serie incidentesh që përfshijnë Maximilian Krah e në vazhdim delegacionin gjerman të Grupit dhe ndikimin e tyre në reputacionin e grupit të Parlamentit Europian.

Krah është nën vëzhgimin kritik publik pas deklaratës së tij se jo të gjithë anëtarët e Schutzstaffel (SS) ishin kriminelë. SS ishte një organizatë e madhe paraushtarake nën drejtimin e Adolf Hitler dhe një Parti Naziste. Të nëntë ligjvënësit e AfD-së janë në listën për përjashtim në votimin që pritet të zhvillohet sot.

Kërkesa për përjashtimin e të gjithë anëtarëve të AfD-së nga grupi i Parlamentit Europian iu dërgua përfaqësuesve të lartë të partive politike në ID. Partia italiane “Lega” tashmë ka rënë dakord me mocionin.