Ministrja e Shëndetësisë dhe Mbrojtjes Sociale, Albana Koçiu mori pjesë në ceremoninë e 30-vjetorit të Urdhrit të Mjekut.

Në fjalën e saj, Koçiu tha se “nga korriku pagat e pothuajse 20 mijë mjekëve dhe infermierëve do të rriten, duke bërë një hap tjetër drejt standardeve europiane”.

Ministrja Koçiu u shpreh krenare për trupën mjekësore, që sipas saj është gjithmonë e më profesionale dhe më e përgatitur.

“Jemi të vendosur për të forcuar me tej marrëdhënien shtet-mjek-qytetar. Qeveria shqiptare dhe MSHMS mbeten të përkushtuara për adresimin e sfidave dhe krijimin e mundësive më të mira për mjekët tanë, duke siguruar që ata të kenë mbështetjen dhe kushtet e nevojshme për të zhvilluar profesionin e tyre këtu në vendin tonë”, nënvizoi Koçiu.

Ministrja Koçiu u shpreh se “do të punojmë së bashku për një sistem shëndetësor më të fortë dhe më cilësor për të gjithë”.

Rritja e pagave për mjekët dhe inferimerët synon jo vetëm rritjen e mëtejshme të cilësisë së shërbimit shëndetësor në Shqipëri, por stimulon brezin e ri për zgjedhjen e këtij profesioni si degë studimi në arsimin e lartë për t’i shërbyer vendit.