Entuziazmi për Kombëtaren në Kaiserau, Duka: Ta shijojmë bashkë Europianin!
![](https://www.vovmagazine.al/wp-content/uploads/2022/02/56-2-150x150.png)
![Entuziazmi për Kombëtaren në Kaiserau, Duka: Ta shijojmë bashkë Europianin!](https://www.vovmagazine.al/wp-content/uploads/2024/06//entuziazmi-per-kombetaren-ne-kaiserau-duka-ta-shijojme-bashke-europianin.jpg)
Ndërsa dje ekipi i Kombëtares mbërriti në tokën gjermane e udhëtoi drejt Kaiseraut në Kamen në kampin bazë për finalet e “EURO 2024”-ës, edhe në mjediset e SportCentrum Kaiserau iu rezervua e njëjta pritje si në aeroportin e Dyseldorfit, me një ceremoni të organizuar nga autoritetet lokale të Kamenit.
Shumë fëmijë dhe familjarë të komunitetit shqiptar mirëpritën kuqezinjtë në një atmosferë fantastike dhe të ngrohtë. Presidenti i FSHF-së Armand Duka, i falënderoi për pritjen dhe i ftoi që të gjithë së bashku ta shijojmë Kampionatin Europian.
Dua t’ju falënderoj të gjithëve. Të gjithë fëmijët dhe të tjerët për pritjen fantastike dhe të ngrohtë që kanë organizuar për ne, që nga aeroporti i Dyseldorfit e deri këtu. Pavarësisht se ne fizikisht nuk kemi qenë këtu, e kemi ndjerë ngrohtësinë tuaj në çdo moment dhe detaj që ekipi jonë këtu të ndihet si në shtëpi. Të gjithë ne shqiptarët jemi vërtetë shumë të lumtur dhe krenarë që jemi pjesë e këtij kompeticioni, më i rëndësishmi sportiv për mua në botë. I ftoj futbollistët tanë dhe të gjithë shqiptarët që do të ndjekin ekipin Kombëtar që ta shijojnë vërtetë këtë Europian, u shpreh Duka.
Ne jemi skuadra e parë mike që vijmë në Gjermani për Kampionatin Europian. Kështu që duke qenë të parë unë uroj që të kemi këmbën e mbarë për të gjithë Kampionatin Europian dhe të kemi një Europian sa më të mirë e të bukur që ta shijojnë të gjithë që do jenë pjesë, në Gjermani, në stadiume dhe në televizionet e të gjithë botës. Ta shijojmë të gjithë bashkë dhe pse jo Shqipëria të fitojë.
![](https://www.vovmagazine.al/wp-content/uploads/2024/06/entuziazmi-per-kombetaren-ne-kaiserau-duka-ta-shijojme-bashke-europianin-6665705449b80.jpeg)
Pas akomodimit, trajneri Silvinjo dhe stafi teknik vendosën që sot t’i lënë pushim lojtarët e nuk ka seancë stërvitore. Ndërkaq, Departamenti i Komunikimit në FSHF njoftoi se mesfushori Ylber Ramadani do të japë një konferencë për media në orën 12:00, në sallën e konferencave, në Kaiserau Sportecenter. Nesër, skuadra vijon normalisht seancat stërvitore që si zakonisht janë të hapura për mediat në 15 minutat e para.