Rreth 40 liderë botërorë pritet të marrin pjesë në një konferencë paqeje për Ukrainën, që do të mbahet në një mal piktoresk zviceran fundjavën e ardhshme.

Qeveria zvicerane tha se ishin ftuar gjithsej rreth 160 presidentë dhe kryeministra. Gjithashtu të pranishëm do të jenë edhe përfaqësues nga Kombet e Bashkuara dhe organizata të tjera.

Qeveria neutrale zvicerane e paraqet samitin si një konferencë paqeje. Por, nuk parashikohet asnjë marrëveshje mes palëve në konflikt, edhe për shkak se Rusia nuk është e përfshirë. Kina, së bashku me vendet e tjera me lidhje të ngushta me Moskën, po qëndrojnë gjithashtu larg.

Kremlini e hodhi poshtë takimin si një ngjarje propagandistike perëndimore. Megjithatë, diplomatët dhe qeveria zvicerane besojnë se kjo mund të shërbejë si një prelud për bisedimet e mëtejshme që mund të përfshijnë Rusinë.

Presidenti ukrainas, Volodymyr Zelensky ka akuzuar Kinën se po ndihmon Rusinë të prishë samitin e paqes në Zvicër i cili do të mbahet në datat 15-16 qershor.

“Rusia, duke përdorur ndikimin kinez në rajon, duke përfshirë diplomatët kinezë, po bën gjithçka për të sabotuar samitin e paqes”, tha Zelensky në një konferencë shtypi pas fjalimit të tij në Dialogun Shangri-La në Singapor.

Zelensky pretendon se Ukraina ka prova se Pekini po ndihmon përpjekjet luftarake të Rusisë, pavarësisht se presidenti Xi Jinping i premtoi atij një vit më parë se Pekini nuk do të përfshihej.