Protesta e radhës e opozitës te Bashkia Tiranë, kujdes me bllokimin e rrugëve!
![](https://www.vovmagazine.al/wp-content/uploads/2022/02/56-2-150x150.png)
![Protesta e radhës e opozitës te Bashkia Tiranë, kujdes me bllokimin e rrugëve!](https://www.vovmagazine.al/wp-content/uploads/2024/06//protesta-e-radhes-e-opozites-te-bashkia-tirane-kujdes-me-bllokimin-e-rrugeve.jpg)
Policia e Tiranës ka marrë masa organizative dhe operacionale për garantimin e rendit publik dhe sigurisë gjatë zhvillimit të tubimit të kërkuar nga “Aleanca për Mbrojtjen e Teatrit”, sot në ora 10:00, pranë Bashkisë. Kjo është protesta e radhës e opozitës, e dyta brenda javës pas asaj të 10 qershorit, sërish për të kërkuar dorëheqjen e Erion Veliajt.
Në zbatim të planit të masave, Policia e Shtetit njofton:
Sot, prej orës 09:30 e në vijim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës. Për këtë arsye sugjerojmë që të përdoren rrugë alternative, deri në përfundim të tubimit, si Unaza e Mesme dhe Unaza e Madhe.
Gjatë disa tubimeve të mëparshme, të zhvilluara nga Aleanca për Mbrojtjen e Teatrit, në sheshin para Bashkisë Tiranë janë evidentuar raste të përsëritura të kundërshtimit të forcave të policisë, përdorimit dhe hedhjes së molotovëve e sendeve të tjera, në drejtim të Bashkisë Tiranë, duke rrezikuar seriozisht jetën dhe shëndetin e punonjësve të policisë dhe vetë pjesëmarrësve në tubime, njofton Policia.
Drejtoria Vendore e Policisë Tiranë respekton plotësisht të drejtën e qytetarëve për të organizuar dhe marrë pjesë në tubime paqësore. Policia u përsërit thirrjen organizatorëve, drejtuesve dhe pjesëmarrësve në tubime për të respektuar ligjin dhe për t’u distancuar nga çdo akt dhune, përfundon njoftimi zyrtar i uniformave blu.