Një bateri makinash elektrike e zhvilluar nga kompania britanike Nyobold duket se do të zgjidhë një prej “halleve” më të mëdha të përdoruesve të këtyre mjeteve. Në testin e saj të parë, bateria e re arriti të karikohej për vetëm 4 minuta e 37 sekonda nga 10% në 80%, një arritje kjo që do t’i japë fund pritjeve të gjata.

Testi u krye me një makinë sportive në një pistë në Bedford dhe është pjesë e përpjekjeve të gjithë industrisë për të karikuar më shpejt automjetet elektrike. Për të krahasuar, momentalisht një superkarikues i Tesla mund të karikojë baterinë e makinës në 80% vetëm për 15-20 minuta. Ekspertët thonë se eliminimi i të ashtuquajturit “ankthi i pritjes” është çelësi për rritjen e shitjeve të automjeteve elektrike.

Prej kohësh është folur se bateritë e natriumit kanë përparësi të mëdha në krahasim me bateritë me litium-jon më të përdorura aktualisht. Jo vetëm që konsiderohen dukshëm më me kosto efektive, por gjithashtu janë më të qëndrueshme sepse mund të prodhohen pothuajse tërësisht pa metale të rrallë. Përveç kësaj, janë më pak të prirura ndaj paqëndrueshmërisë termike dhe mund të kenë një jetëgjatësi më të gjatë, duke përmirësuar performancën dhe besueshmërinë e makinave elektrike.

Një bateri e zhvilluar nga shkencëtarët në Institutin e Avancuar të Shkencës dhe Teknologjisë në Korenë e Jugut (KAIST) mund të përshpejtojë edhe një herë kalimin në lëvizshmëri elektrike. Siç përshkruajnë në revistën Energy Storage Materials, ata mund të ngarkojnë dhe shkarkojnë plotësisht ruajtjen e energjisë në vetëm disa sekonda shumë më shpejt se procesi normal i mbushjes së një makine me lëndë djegëse fosile.

Kjo mundësohet nga materialet që zakonisht përdoren për të ashtuquajturat superkondensatorë. Këto janë pajisje të ruajtjes së energjisë me densitet jashtëzakonisht të lartë të energjisë që njihen gjithashtu për shpejtësinë e tyre të madhe të karikimit, por ato mund të ruajnë vetëm një sasi shumë të vogël energjie. Studiuesit tani kanë zhvilluar një lloj hibridi bateri-superkondensator për të qenë në gjendje të përfitojnë nga të dyja teknologjitë; të arrijnë vlera rekord për energjinë dhe densitetin e fuqisë.