Futbolli shqiptar në zi/ Ndahet nga jeta në moshën 81-vjeçare legjenda Bejkush Birçe!
![](https://www.vovmagazine.al/wp-content/uploads/2022/02/56-2-150x150.png)
![Futbolli shqiptar në zi/ Ndahet nga jeta në moshën 81-vjeçare legjenda Bejkush Birçe!](https://www.vovmagazine.al/wp-content/uploads/2024/06//futbolli-shqiptar-ne-zi-ndahet-nga-jeta-ne-moshen-81-vjecare-legjenda-bejkush-birce.jpg)
Futbolli shqiptar është në zi, pasi është ndarë nga jeta legjenda e futbollit Bejkush Birçe.
Presidenti i FSHF, Armand Duka ka shprehur ngushëllimet për vdekjen e Birçes, ndërsa thotë se ai ka dhënë një kontribut të madh në futbollin shqiptar.
“Kemi humbur një njeri me karakter të fortë, një mik dhe një familjar shumë të mirë”, shkruan Duka.
“I pikëlluar pas lajmit të ndarjes nga jeta të Bejkush Birçes! Kemi humbur një nga njerezit me më shumë kontribute në futbollin shqiptar, si lojtar, trajner e drejtues në FSHF. Kemi humbur një njeri me karakter të fortë, një mik dhe një familjar shumë të mirë.
Në emrin tim dhe të komunitetit të futbollit shqiptar, dua t’i shpreh ngushëllimet e mia familjes, së afërmve dhe miqve, të cilët kanë humbur një njeri shumë të dashur për ta. U prehsh në paqe Bejkush Birçe!”, thuhet në mesazhin ngushëllues të Dukës.
Bejkush Birçe, një nga emrat më të mëdhenj të futbollit shqiptar, dha kontribut si lojtar dhe trajner i Kombëtares, ndërkohë që ishte edhe zëvendëspresident i FSHF.
Birçe e kaloi karrierën e tij si futbollist te Partizani, ndërkohë që e drejtoi më pas edhe si trajner, sikurse bëri me Naftëtarin, Flamurtarin, Lokomotivën e Durrësit dhe Dinamon.
Gjithashtu, ai mbahet mend si një nga trajnerët më të shquar të Kombëtares, teksa drejtoi kuqezinjtë në vitet ’90, në një periudhë të vështirë për vendin.
FSHF i shprehu ngushëllimet familjes, së afërmve dhe miqve të Birçes për këtë humbje të madhe.
Homazhet për Bejkush Birçen do të zhvillohen ditën e hënë në ambientet e stadiumit “Air Albania”, duke nisur nga ora 11:00.