Miomat e mitrës, gjithçka që duhet të dini!
![](https://www.vovmagazine.al/wp-content/uploads/2022/02/56-2-150x150.png)
![Miomat e mitrës, gjithçka që duhet të dini!](https://www.vovmagazine.al/wp-content/uploads/2024/07//miomat-e-mitres-gjithcka-qe-duhet-te-dini.jpeg)
Miomat (fibroidet) e mitrës janë rritje jo kanceroze të indit muskulor të mitrës. Mioma mund të shfaqet si një miomë e vetme ose më shumë mioma dhe me madhësi të ndryshme. Zakonisht prekin vajzat dhe gratë e moshës 30 dhe 40 vjeçe. Nëse janë shfaqur në moshë më të re, miomat/fibroidet rriten më shpejt. Prania e miomës tek një anëtar i rrethit të ngushtë në familje tregon një rritje rreziku për ju.
Mbipesha dhe presioni i lartë i gjakut janë faktorë rreziku shtesë që rrisin mundësinë e shfaqjes së miomave. Miomat mund të shkaktojnë simptoma shumë të lehta, mund të mos keni fare simptoma, por ato mund të jenë edhe serioze si presion në fshikëz ose rektum, urinim i shpeshtë, mosmbajtje e urinës, kapsllëk dhe/ose dhimbje rektale, dhimbje në pjesën e poshtme të shpinës dhe/ose në bark, fryrje, parehati të shoqëruara me dhimbje në zonën e stomakut, ndryshime në ciklin menstrual dhe gjakderdhje të rëndë.
Ende nuk ka një përgjigje konkrete se çfarë i shkakton saktësisht miomat, megjithatë, është konfirmuar se rritja e tyre lidhet me hormonet femërore estrogjen dhe progesteron. Hulumtimet tregojnë se gjasat janë më të mëdha për shfaqjen e miomave nëse cikli juaj menstrual ka filluar në një moshë më të re.
Disa gra me mioma/fibroide kanë gjakderdhje jashtëzakonisht të rëndë gjatë ose para/pas menstruacioneve. Si pasojë, ato bëhen anemike, me ndjenjë lodhjeje dhe mungesë energjie dhe në raste të rënda deri në probleme me zemrën.
Në disa raste, miomat/fibroidet mund të bllokojnë tubat fallopiane, ose nëse rriten përgjatë murit të brendshëm të mitrës, mund ta bëjnë të vështirë ngjitjen e një veze të fekonduar. Miomat më të mëdha mund të pësojnë shpërbërje të brendshme, copat e të cilave shpërndahen në qarkullimin e përgjithshëm në trupin e gruas.