Qelizat tumorale të riprogramuara në ”kuaj trojanë”, të cilat vetëshkatërrohen duke vrarë gjithashtu të gjitha shoqërueset e tyre rreth vetes. Ky është rezultati i marrë nga grupi kërkimor i drejtuar nga Universiteti Shtetëror Amerikan i Pensilvanisë, falë futjes së një ndërprerësi gjenetik.

E testuar në laborator në qelizat njerëzore dhe minj, teknika e publikuar në revistën ”Nature Biotechnology” ka rezultuar e aftë të eliminojë qelizat kancerogjene më rezistente ndaj terapisë, të cilat rrezikojnë të shumohen sërish në një tumor të ri që është gjithnjë e më i vështirë për t’u trajtuar.

Ilaçet kundër kancerit ndonjëherë dështojnë jo sepse janë joefektive, por për shkak të diversitetit të natyrshëm të kancerit dhe faktit që, shpesh, disa qeliza bëhen rezistente ndaj trajtimit, duke lejuar që kanceri të kthehet. Prandaj, studiuesit e udhëhequr nga Scott Leighow kërkuan një mënyrë për të parashikuar këtë mekanizëm dhe për ta kthyer atë në avantazhin e tyre. Ata zhvilluan një qark gjenetik, një lloj çelësi i përbërë nga dy gjene që ndizen dhe fiken në kohë të ndryshme.

Kur e para aktivizohet, qeliza bëhet përkohësisht rezistente ndaj një medikamenti specifik. Në këtë mënyrë, trajtimi e lë atë të paprekur, duke e lejuar atë të shumohet në kurriz të qelizave të tjera kancerogjene që kanë zhvilluar rezistencë në mënyrë natyrale. “Ne jemi në gjendje të synojmë qelizat e tumorit pa e ditur se çfarë janë, pa pritur që ato të rriten ose të zhvillohet rezistenca sepse atëherë është tepër vonë”-thotë Leighow.

Ndërkaq, një test inovativ i kancerit të gjirit i mbështetur nga inteligjenca artificiale ka potencial për të zbuluar sëmundje në një fazë të hershme dhe premton të japë rezultate brenda 10 minutave. Mbi të gjitha nuk të ekspozon ndaj rrezatimit të mamografisë. Aktualisht në fazën e provës klinike, Ailis është funksional si një metodë imazherike që mat ndryshimet termike në gji, inde dhe zonat rreth tij.