“Vendi më i lirë në Europë për të udhëtuar këtë verë është Shqipëria. Destinacioni mesdhetar ofron plazhe ëndrrash që lagen nga ujërat blu të kaltër të Adriatikut dhe detit Jon”. Kështu shkruan Luis Martinez në një artikull të botuar në revistën spanjolle “Actualidad Viajes” (actualidadviajes.com). “Përveç kësaj, ju mund të zbuloni qytete plot me monumente dhe hapësira të tjera natyrore me bukuri të jashtëzakonshme”.

Çfarë duhet të shihni në Shqipëri?

Shqipëria ndodhet në gadishullin ballkanik dhe rrethohet nga malet me të njëjtin emër dhe detet Adriatik e Jon. Në mesjetë, Shqipëria ishte pjesë e Perandorisë Bizantine dhe nën udhëheqjen e Skënderbeut,  Heroit Kombëtar i rezistoi osmanëve për 25 vjet. Pavarësisht kësaj, ajo përfundoi duke u mundur dhe mbeti nën kontrollin e Perandorisë Turke deri në shekullin e XX-të. Më pas, për disa dekada, Shqipëria qëndroi e izoluar dhe në shekullin XXI vendi u hap për turizmin.

Riviera Shqiptare

Një pjesë e bregdetit është emërtuar si Riviera Shqiptare falë bukurisë së saj. Eshtë një zonë bregdetare prej rreth 100 kilometrash që ofron plazhe të mrekullueshme me ujëra të pastër kristal dhe limane të vegjël, të rrethuar nga shkëmbinj marramendës. Gjithashtu, ju mund të shihni malet e larta dhe e gjithë kjo me një klimë që ofron shumë orë diell.

Kryesisht, kjo përkon me Qarkun e Vlorës, në brigjet e detit Jon. Më konkretisht, Riviera fillon në jug të Parkut Kombëtar të Llogorasë, ku mund të shijoni shtigjet e tij mbresëlënëse. Vazhdoni të udhëtoni nëpër zona si Himara, Borshi, Piqeras, Qeparo e Lukova. Në të gjitha këto, gjenden plazhe spektakolare, hotele dhe restorante të mira e një jetë nate e gjallë.

Shumë fshatra tradicionale të stilit mesdhetar, gjithashtu ndodhen në Rivierën Shqiptare si Lëkurësi, me kishat ortodokse, kalatë, portet e vogla dhe shkëmbinjtë marramendës. “Kryeqyteti” i Rivierës Shqiptare është Vlora, një qytet me gati 100 000 banorë, i mbushur me histori dhe trashëgimi monumentale.

Në fakt, është një nga qytetet më të vjetër në vend, pasi ishte një port romak dhe shërbeu si kryeqyteti i parë i kombit pas pavarësisë në vitin 1912. Pikërisht këtu mund te vizitoni monumentin dhe Muzeun e Pavarësisë, si dhe muzeun interesant Etnografik. Por, mbi të gjitha, nëse vizitoni Vlorën, duhet të shihni Xhaminë e Muradies, e cila u ndërtua në shekullin e XVI-të dhe i ka rezistuar luftërave e tërmeteve.

Autori i saj ishte arkitekti Sinani i Madh, në emër të Sulejmanit të Madhërishëm. Njihuni gjithashtu me faltoren e Kuzum Babës, e cila dominon qytetin nga një kodër dhe Kalanë e Kaninës në periferi.

Ju mund të bëni një ekskursion në Lagunën e Nartës dhe të vizitoni një manastir tjetër, të ndërtuar midis shekujve XIII- XIV. Mos humbisni dhe vendet arkeologjike si Orikumi. Së fundi, mos u largoni nga Riviera Shqiptare, pa vizituar qytetin e Sarandës. Në rrethinat e saj, zbuloni Lagunën e Sarandës, një nga më të bukurat në vend, si dhe rrënojat e qytetit të lashtë grek parahistorik të Butrintit, i cili është sit i Trashëgimisë Botërore të UNESCO-s. Brenda qytetit ndodhet Kisha bizantine e Shën Nikollës së Barit.

“Fjordet shqiptare”, një tjetër mrekulli në vendin më të lirë në Europë

Këto janë ultësirat e para të Alpeve Dinarike Shqiptare dhe rrethojnë liqenin e Komanit, të cilin e krijoi njeriu duke mbyllur Lumin Drin përmes digës. Për t’i parë, ju duhet të bëni një ekskursion me traget nga Komani për në qytetin e Fierzës, buzë ujërave të liqenit Drin. Kështu do të keni mundesi te shihni pamjet mbresëlënëse karstike të maleve Prokletije.

Udhëtimi zgjat rreth tre orë dhe përfshin rreth 34 kilometra. Për më tepër, tragetet kanë hapësirë ​​për automjete dhe ndenjëse, në mënyrë që të shijoni peizazhin. Nga qyteti i Fierzës, mund të zgjidhni një rrugë të bukur për të ecur drejt Thethit, në Parkun Natyror të Valbonës, me peizazhet e tij alpine, pyjet e dendur dhe luginat e tij të thella.

Berati, “qyteti i një mbi një dritareve”

Berati, një sit i Trashëgimisë Botërore të UNESCO-s njihet si “qyteti i një mbi një dritareve”. Ky emër i detyrohet veçantisë së planit urbanistik, me shtëpitë me shumë dritare të shtrira në një kodër. Pikërisht, këto shtëpi kanë një strukturë klasike otomane dhe përbëjnë një qendër të bukur historike.

Berati është i rrethuar nga male kolosale dhe laget nga Lumi Osum. Përveç kësaj, ai është qyteti më i vjetër në vend. Në fakt, nëpër qytet kanë kaluar romakët, bizantinët, osmanët, sllavët e bullgarët. Nga lart, mbizotëron qytetin Kalaja e tij, e cila ka në perimetrin e saj edhe disa kisha e xhami. Nën të, janë mollët e Mangalemit dhe qendra e qytetit, ndërsa në anën e kundërt ndodhet sheshi historik i Goricës.

Gjirokastra

Ky qytet është gjithashtu një sit i Trashëgimisë Botërore të UNESCO-s, i cili laget nga Lumi Drin. Gjirokastra ruan të paprekur pjesën dërrmuese të monumenteve të saj. Më e rëndësishmja është Kalaja e shekullit të XII që dominon qytetin nga maja e një mali. Gjithashtu, ju mund të vizitoni ndërtesa të tjera si Kulla e Sahatit. Brenda ndodhet Muzeu Kombëtar i Armëve. Gjirokastra karakterizohet nga rrugët e ngushta dhe me kalldrëm. Janë rrugë si ato që përshkruan Ismail Kadare e ku strehohet Pazari i Vjetër, zanafilla e të cilit daton në shekullin e XVI. Aty shihet edhe Xhamia e Pazarit.

Një tjetër karakteristikë e këtij qyteti është grupi i shtëpive madhështore të arkitekturës osmane. Ndër to, ju rekomandojmë të vizitoni shtëpitë e Zekatëve dhe Skëndulatëve. Rezidenca e Enver Hoxhës, diktatorit të vendit për 49 vjet, aktualisht është selia e Muzeut Etnografik. Nga ana e tij ndodhet Ura e Ali Pashës që ofron pamje të mrekullueshme të zonës.

Tirana

Për të njohur Shqipërinë, vendin më të lirë në Europë, duhet të vizitoni kryeqytetin e saj. Eshtë një qytet me rreth 800 mijë banorë e që e ka origjinën në periudhën e neolitit. Qendra e tij është Sheshi Skënderbej, ku ofrohen hotelet më të mira dhe rreth të cilit ndodhen monumentet kryesore. Dominohet nga një statujë kushtuar Heroit Kombëtar të vendit, Gjergj Kastrioti Skënderbeut.

Aty mund të shihni edhe Muzeun Kombëtar Historik, me një mozaik spektakolar në fasadën e tij dhe Pallatin e Kulturës. Gjithashtu, mund të vizitoni Xhaminë e Et’hem Beut që daton në shekullin XVIII dhe është shumë afër Kullës së Sahatit.

Kalaja e Tiranës ofron pamje spaktakolare, e cila konkurron me atë të Petrelës, kjo e fundit ndodhet 12 kilometra larg qytetit. Por, kryeqyteti ka edhe disa kisha katolike me bukuri të jashtëzakonshme. Midis tyre, Katedralja Ortodokse “Ringjallja e Krishtit”.

Së fundi, ndërtesa të tjera si Piramida spektakolare, një ish-muze kushtuar Hoxhës, Pallati Presidencial apo i Brigadave, Universiteti i Tiranës apo Akademia e Shkencave plotësojnë trashëgiminë monumentale të Tiranës.