Vitin e kaluar, normat globale të vaksinimit të fëmijëve mbetën nën nivelet e para pandemisë koronavirus, siç raportoi sot Organizata Botërore e Shëndetësisë (OBSH), si dhe Fondi i Kombeve të Bashkuara për Fëmijët (UNICEF), duke ngritur shqetësime te ekspertët.

Në vitin 2023, 84% e fëmijëve në mbarë botën u vaksinuan plotësisht kundër difterisë, tetanozit dhe kollës së mirë, një vaksinim i trefishtë i konsideruar si një tregues kryesor i shkallës së vaksinimit të fëmijëve. Shifra përfaqëson një rënie të lehtë në krahasim me nivelet e para pandemisë të regjistruara në vitin 2019, sipas këtij raporti.

Numri i fëmijëve pa një dozë të vetme të vaksinimit të trefishtë u rrit në 14,5 milion vitin e kaluar, nga 12,8 milion para fillimit të pandemisë, siç dhe deklaroi organizata.

Gjatë pandemisë së COVID-it, shumë vende pësuan vonesa e gjithashtu ndërprerje në programet e tyre të vaksinimit.

Në disa vende, numri i skeptikëve ndaj vaksinave është rritur pas pandemisë, u shpreh ekspertja e OBSH-së Katherine O’Brien. Ky zhvillim po rezulton në vdekjen e fëmijëve, shtoi ajo.

O’Brien vuri në dukje se skepticizmi rreth vaksinimit në vendet më të pasura prek edhe rajone të tjera, për shembull, kur njerëzit me prejardhje emigrimi me bazë në Europë përhapin dezinformata në vendet e tyre.

Eksperti i UNICEF-it, Ephrem Lemango vuri në dukje se në vendet me të ardhura të ulëta, mungesa e besimit në institucionet e kujdesit shëndetësor, si dhe aksesi i kufizuar në vaksina pengojnë gjithashtu progresin në vaksinim.

Sipas OBSH-së dhe UNICEF-it, konfliktet e armatosura janë një tjetër pengesë, ku më shumë se gjysma e të gjithë fëmijëve të pavaksinuar jetojnë në vende të karakterizuara nga paqëndrueshmëria, dhuna dhe cënueshmëria e madhe. Që të dyja organizatat thanë po ashtu se më shumë se 100 vende janë prekur nga shpërthimet e fruthit, në pesë vitet e fundit e ky përbën një alarm.