Një 42-vjeçar ra në prangat e policisë Krujë pasi gjatë kontrolleve në afërsi të banesës së tij në Thumanë u konstatua një ambient i përshtatur për kultivim bimësh narkotike, të llojit Cannabis Sativa.  Operacioni policor i koduar “Plant 5” u zbatua në kuadër të planit operacional “Territor i pastër”. Materialet procedurale i kaluan Prokurorisë Tiranë.

Njoftimi i policisë:

Komisariati i Policisë Krujë, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, në vijim të punës për parandalimin e kultivimit të bimëve narkotike, në zbatim të masave të përcaktuara në planin operacional “Territor i pastër”, ka finalizuar operacionin policor të koduar “Plant 5”.

Si rezultat i tij u arrestua shtetasi A. M., 42 vjeç, banues në Thumanë, për veprën penale “Kultivimi i bimëve narkotike”, parashikuar nga neni 284 i Kodit Penal.

Gjatë kontrolleve në afërsi të banesës së 42-vjeçarit, është konstatuar një ambient i përshtatur për kultivim, ku u gjetën 248 bimë të dyshuara narkotike kanabis.

Një pjesë e bimëve u sekuestrua në cilësinë e provës materiale, ndërsa pjesa tjetër u asgjësua me anë të djegies.

Materialet procedurale i kaluan Prokurorisë.