Kryeministri malazez, Milojko Spajiç ka riorganizuar kabinetin qeveritar që drejton, duke prezantuar një formacion të ri me ndikim të rritur pro serb e boshnjak në Malin e Zi, si dhe duke zgjeruar shumicën e tij parlamentare nga 46 në 53 deputetë. Pothuajse nëntë muaj pas marrjes së detyrës, një ditë më parë, ekzekutivi i ri siguroi miratimin e 53 nga 81 deputetë ndërsa opozita zgjodhi të bojkotojë votimin.

Partia e qendrës “Evropa tani!” (PES), e udhëhequr nga Spajiç, fitoi zgjedhjet parlamentare në qershor të vitit të kaluar, por nuk ishte në gjendje të siguronte një shumicë absolute. Pas negociatave të zgjatura, më në fund, ai ishte në gjendje të formonte qeverinë e tij të parë të koalicionit në tetor 2023. Në vendin e vogël ballkanik në Adriatik, çështja e identitetit etnik vazhdon të përçajë shoqërinë.

Mali i Zi shpalli pavarësinë nga Serbia në vitin 2006, pas një referendumi. Disa nga 600 mijë banorët e tij e identifikojnë veten si pjesë e kombit serb. Katër nga ministrat e sapoemëruar janë anëtarë të partisë “Demokracia e re serbe” (NSD), e udhëhequr nga presidenti i parlamentit Andrija Mandiç, i cili thuhet se ka lidhje të ngushta me Kremlinin.

Partitë e hapura pro-serbe dhe pro-ruse, duke përfshirë NSD-në e “Aleancën për ardhmërinë e Malit të Zi” (ZBCG), kishin mbështetur më parë qeverinë Spajiç, por nuk kishin poste ministrore. Në vend të kësaj, atyre iu caktuan role të rëndësishme brenda administratës shtetërore, si dhe në kompanitë shtetërore e të lidhura me to.

Partisë Boshnjake (BS), që më parë ishte në opozitë, i janë dhënë pesë poste ministrore, duke përfshirë atë të ministrit të parë të Jashtëm boshnjak, Ervin Ibrahimoviç, i cili është gjithashtu një nga shtatë nënkryetarët e qeverisë. Opozita akuzoi Partinë Boshnjake për rreshtim me pro serbët e me pro rusët.